Atu garante akontabilidade no transparansia husi ejekusaun orsamentu ba implementasaun projetu bee mós iha suku, Komunidade Suku Manlala no Suku Leohat hala’o Enkontru akontabilidade 50%.
Iha suku Manlala no suku Leohat, Sub Distrito Soibada, Distrito Manatutu enkontru nee halao loron, 18-19/09/2014. Enkontru akontabilidade 50% iha suku rua nee foka ba projetu kanalizasaun bee mos iha Aldeia Wenibak no Aldeia Ahaekleu, projetu rua ne’e hanesan projetu ne’ebé pas parte ba projetu implementasaun programa PNDS faze primeiru iha suku 149.
Tuir Arcanjo Quintaun Soares nudar Presidente Komisaun Planeamento Akontabilidade (KPA) husi Suku Leohat katak objektivo husi enkontru akontabilidade 50% ne’e, mak ho intensaun atu informa progresu implementasaun ne’ebé atinji ona iha parte fisiku no ejekusaun orsamentu, hodi esklarese ba komunidade kona ba orsamentu ne’ebé uja ba implementasaun projetu.
Domingos Gonzaga hanesan komunidade ne’ebé partisipa aktivo iha implementasaun programa PNDS, deklara katak enkontru ne’e inportante tebes ba sira atu nune komunidade sira mos bele hatene oinsá kustu ba utulizasaun orsamentu projetu bee mos ne’ebé implementa, iha duni ka lae transparansia no akontabilidade.
Ho implementasaun projetu bee mos nee, Martinho de Lima Ximenes, nebe hanesan chefe suku Leohat, hato’o agradese ba governo tamba liu husi programa PNDS bele rejolve problema kiik ne’ebé komunidade sira hasoru iha Suku laran, tuir Chefe Suku katak dala barak ona sira tenta halo proposta ba NGO lubuk ida la konsege atu rezolve problema bee mos, maibé liu husi programa PNDS maka bele rejolve problema kona-ba falta bee mos ne’ebé komunidade hasoru.
Feto Partisipa iha kontruksaun
Espera katak ho polítika ne’ebé governo trasa liu husi implementasaun programa PNDS iha Suku hotu iha territóriu Timor Leste ne’ebé komunidade rasik mak halo plano, gere, deside no implementa bele rejolve neneik problema kiik sira iha suku laran, ho prinsípiu optimista katak mesmu neneik maibe bebeik sei bele alkansa
desenvolvimento iha baze ne’ebé hanesan parte integrado husi desenvolvimento nasional, no savi inportante mak utulizasaun orsamentu tengki iha transparancia hodi hamosu konfiansa fiar malu iha komunidade nian leet.
