Husu no hatan

P. PNDS sei kusta hira?

Finansiamentu nasionál ba PNDS sei kusta besik ba miliaun US$ 294.3 iha periódu tinan ualu.

P. Suku sira simu osan hira?

Sei disponibiliza subvensaun ba pelumenus projetu ida maneja hosi komuindade kada tinan iha kada suku 442.

Subvensaun anuál sei iha montante média ho valór US$ 50,000 durante tinan tolu primeiru, ne’ebé sei aumenta ba montante média ho valór US$ 75,000 iha tinan hirak tuirfali.

P. Suku hotu-hotu simu montante hanesan ka la’e?

La’e.

Suku sira simu montante finansiamentu la hanesan.  Valór subvensaun ba kada suku dirije hosi kriteriu objetivu, hanesan suku nia izoladu to’o iha ne’ebé no populasaun, no montante mak halai hosi $40,000 to’o $70,000 ba infra-estrutura.

Fórmula ba kalkulasaun kada suku nia subvensaun hanesan tuirmai ne’e:

 

Distánsia hosi Kapitál Distritu

La Remota

Remota

Remota los

Remota tebe-tebes

Populasaun Suku

<10km

10 – 30km

30 – 55km

>55km

Menus hosi 2,000  Subvensaun Totál

$40,000

$45,000

$50,000

$55,000

                      Másimu ba operasionál

$5,000

$5,500

$6,000

$6,500

2,000 to 4,500      Subvensaun Totál

$45,000

$50,000

$55,000

$60,000

                      Másimu ba operasionál

$5,250

$5,750

$6,250

$6,750

4,500 to 7,500         Subvensaun Totál

$50,000

$55,000

$60,000

$65,000

                      Másimu ba operasionál

$5,500

$6,000

$6,500

$7,000

Liu hosi 7,500     Subvensaun Totál

$55,000

$60,000

$65,000

$70,000

                   Másimu ba operasionál

$5,750

$6,250

$6,750

$7,250

Haree publikasaun montante subsidiu pnds iha tinan 2014

Subvensaun operasionál uza hodi selu faze planeamentu ba projetu, no subvensaun infra-estruturas uza hodi sosa materiais no halo konstrusaun.

Alokasaun ba tinan hirak tuirmai parte balun sei determina hosi komunidade nia dezempeñu.  Ida-ne’e sei bazeia ba rezultadus hosi avaliasaun no auditória finál no inklui avaliasaun sosiál, téknika no aspeitus hosi jestaun finanseira hosi projetu(s) tinan anteriores.

P. Saida mak akontese karik suku ida la gasta hotu osan subvensaun ne’e?

Osan ne’ebé la gasta bainhira projetu remata sei uza ba iha orsamentu tinan tuirfali mai (adisaun ba montante padraun ba subvensaun anuál).  Maibé, projetu foun sei labele hahú to’o projetu ne’ebé la’o hela kompleta ona.

Karik suku ida halo adotasaun orsamentu ba iha tinan oin-oin tanba implementasaun projetu neineik, mak sei hamenus sira-nia alokasaun orsamentu foun to’o fundus programa ba tinan hirak liubá gasta hotu ona. Ida-ne’e sei deside tuir kazu ida-idak nian hosi Sekretariadu PNDS.

P. Ministériu ne’ebé mak maneja PNDS?

PNDS mak inisiativa Governu Timor-Leste nian, maneja hosi Ministériu Administrasaun Estatál, hamutuk ho Ministériu Finansas.  Ministériu Saúde, Edukasaun, Infra-estrutura, Agrikultura no Peska, no Ajénsia Dezenvolvimentu Nasionál kaer mós papél ida liuhosi Grupu Traballu Tékniku Inter-Ministeriál.

Grupu Traballu Tékniku ne’e nia papél mak atu garante:

  • Dezenvolvimentu no implementasaun PNDS ne’ebé loloos.
  • Alokasaun fundus ba suku tuir tempu.
  • Supervizaun ba alokasoens rekursus hodi implementa PNDS tuir ninia objetvius no prinsípius.

P. Sé mak selu PNDS?

PNDS ne’e programa nasionál ida no finansiadu hosi Governu Timor-Leste.  Fundus ba implementasaun PNDS transfere hosi Ministériu Finansa ba konta bankaria espesiál sira ne’ebé estabelese iha kada suku espesifikamente ba PNDS.

PNDS mós simu apoiu hosi Governu Austrália.  Apoiu Programa ba PNDS fó asisténsia téknika no treinamentu ba Sekretariadu Nasionál, no sei tulun mós monitorizasaun no avaliasaun.

Intende katak doadór no parseiru dezenvolvimentu sira sei kontribui finansiamentu ba PNDS, liuliu ba treinamentu no asisténsia téknika. Ho tempu Governu sei fó liután ka selu kustu hirak-ne’e hotu.

P. Projetu saida de’it mak komunidade sira bele harii?

PNDS iha menu ida ba tipu atividade sira ne’ebé permite. Buat hirak-ne’e bens públiku bazeia ba kritériu hirak ne’ebé defini iha Lei Planeamentu Dezenvolvimentu Integradu iha Distritu (PDID)

  1. Infraestrutura Asesu nian, inklui estrada, ponte, dalan, ponte-kais lokál, nst.
  2. Sistema Bee Suku nian ne’ebé ki’ik, simples (nu’udar ezemplu, sistema gravidade, posu, kaptasaun bee udan, no protesaun bee-matan), konstrusaun ka reabilitasaun foun, no bele inklui instalasaun lavajen.  Bele halo instalasaun saneamentu nu’udar parte husi instalasaun públika hanesan eskola ka klínika. La bele halo instalasaun sentina públika ne’ebé ketak no la kolokadu ho instalasaun públika (n.e. eskola, klínika, merkadu nst.
  3. Irrigasaun no drenajen, inklui barrajen (taka-bee), kanál, odamatan nst.
  4. Estensaun, renovasaun ka reabilitasaun ba eskola lokál, nu’udar ezemplu, sala aula adisionál, instalasaun sentina, mobiliáriu no ekipamentu.
  5. Konstrusaun ka reabilitasaun ba sentru primeira infánsia no jardín-infánsia, inklui instalasaun sentina, mobiliáriu, ekipamentu, nst.
  6. Estensaun, renovasaun ka reabilitasaun ba Postu Saúde/Klínika lokál, inklui, nu’udar ezemplu, mobília, uma-kakuluk, pinta, ekipamentu báziku, instalasaun bee no saneamentu.
  7. Abilitasaun ba profesór/a no traballadór saúde ne’ebé kolokadu ho eskola ka klínika
  8. Sede komunidade ne’ebé bele uza ba objetivu oioin, maibé só bele harii sede foun ida iha suku ida iha siklu haat inisiál husi programa PNDS tinan 8 ida-ne’e.
  9. Instalasaun públika komunidade nian ho eskala ki’ik, hanesan merkadu lokál sira, fornesimentu eletrisidade, labarik sira nia fatin halimar, no instalasaun desportu.

Haree ba limitasoens téknikas, liuliu iha tinan hirak foufoun bainhira PNDS nia pesoál no komunidade sira dezenvolve hela sira-nia abilidades, rekomenda ona suku sira atu konsidera posibilidade ba estensaun, reabilitasaun ka renovasaun ba ativus infra-estruturas públikus komunidade nian ne’ebé iha tiha ona duké halo konstrusaun ba instalasaun foun sira.

P. Tipu projetu saida de’it mak PNDS la suporta?

Atividade sira ne’ebé PNDS la suporta inklui:

  1. Kualkér buat ruma ne’ebé kontra lei iha nasaun ne’e.
  2. Kualkér buat ruma ne’ebé mak envolve armas, drogas, tabaku, asbestos ka substánsia perigoza sira seluk.
  3. Atividades uza rai hirak ne’ebé iha disputa na’in ka bele desloka ema.
  4. Pagamentu ba kompensasaun ka aluga hodi uza rai.
  5. Atividade sira ne’ebé estraga meiu-ambiente.
  6. Eskritóriu governu ka suku no fatin reza nian.
  7. Pagamentu ba governu nia salárius ka subsídius.
  8. Kualkér finansiamentu ba partidus polítikus, atividades polítikas, halo kampaña, etc.
  9. Rotina ki’ik, manutensaun rekorrente sira labele finansiadu hosi PNDS nu’udar projetu ketak ida.  (Eskala boot no Operasoens no manutensaun planeada bele finansiadu hosi PNDS.  Enkoraja suku sira atu inklui instrumentus no ekipamentu nesesárius ba operasoens no manutensaun iha tinan(sira) primeiru iha faze dezeñu ba projetu, karik fundus natoon, atu uza montante subvensaun ne’e tomak).
  10. Konstrusaun ba eskola foun sira, klínika ka instalasaun médika foun sira ne’ebé presiza Ministériu Nasionál nia provizaun ba pesoál no ekipmamentu.  (Reabilitasaun ka restorasaun ba funsionalidade infra-esturtura ne’ebé iha ona bele finansiadu ho koordenasaun própria ho ministériu tékniku ne’ebé relevante).
  11. Atividade sira ne’ebé konsideradu boot liu ba komunidade atu harii no mantein.

P. Oinsá mak bele gasta osan subvensaun?

Fundus subvensaun fó ba suku halo iha parte rua, fundus operasionais no fundus infra-estruturas.

Fundus operasionais, besik 10-14% hosi subvensaun totál, ne’e bele uza ba:

  • Insentivus ba ekipa suku nian
  • Transporte,
  • Ekipamentu eskritóriu nian
  • Papelaria
  • Fotokopia nian
  • Komunikasaun nian
  • Kustus reuniaun nian
  • Kustus treinamentu nian
  • Kustus peskiza no dezeñu nian.

Fundus infra-estruturas, suku nia subvensaun totál menus fundus operasionais, bele uza ba:

  • Materiál konstrusaun nian
  • Traballadór
  • Transporte ba materiál sira
  • Instrumentus
  • Aluga ekipamentu no servisu sira seluk ne’ebé presiza.

Aumenta tan ba iha leten, kada suku sei maneja mós Fundus Operasoens no Manutensaun. Fundus hirak-ne’e halibur hosi kada umakain iha komunidade no uza ba operasaun ka manutensaun infra-estruturas no obra sira ne’ebé harii ka reabilita ona liuhosi PNDS.

P. Xefe Suku iha PNDS hala’o papél saida de’it?

Xefe Suku nu’udar lider tradisionál ne’ebé ema hili iha suku ida.

Xefe Suku lidera sosializasaun no enkoraja mane no feto sira husi aldeia hotu-hotu atu partisipa.

Sira revee relatóriu sira no akompaña kestaun ka preokupasaun ne’ebé komunidade levanta. Sira tulun atu rezolve keixa sira no rezolve konflitu lokál ho justu. Xefe Suku relata progresu PNDS ba Komisaun Dezenvolvimentu Sub-Distritu no Distritu.

Sira mós garante koordenasaun no armonizasaun entre projetu sira PNDS nian no programa ka projetu sira seluk ne’ebé eziste iha suku laran.

Xefe Suku la simu saláriu ba serbisu ne’ebé sira halo ba PNDS.

Hodi hetan informasaun liután kona-ba papél lideransa tradisionál iha Timor-Leste, haree Law 3/2009, Community Leaderships and Their Election. (Lei 3/2009, Lideransa Komunitáriu no sira-nia eleisaun).

P. Saida mak EJS (Ekipa Jestaun Suku)?

Liuhosi prosesu demokrátiku komunidade hili Ekipa Jestaun Suku (EJS) hodi fiskaliza planeamentu no implementasaun PNDS iha sira-nia suku. Sira serbisu ba sira-nia komunidade.

EJS orienta prosesu hodi hili no harii projetu hamutuk ho komunidade. Sira mós jere osan ne’ebé governu fó ba kada suku ba projetu sira PNDS nian. EJS sira hetan formasaun husi fasilitadór sira Sub-Distritu nian kona-ba abilidade administrativa no téknika ho nune’e sira bele jere didi’ak atividade PNDS no hala’o sira-nia devér ho efikás.

EJS inklui ekipa tolu: Komisaun Planeamentu no Akontabilidade (KPA), Ekipa Implementasaun Komunidade (EIP) no Ekipa Operasaun no Manutensaun (EOM), no mós Fasilitadór Suku na’in-rua (ne’ebé tenke inklui pelumenus feto ida).

Fasilitadór Suku sira informa sira-nia komunidade kona-ba PNDS nia atividade, planu no desizaun hodi envolve sira-nia komunidade ho ativu, no mós apoia no promove transparénsia, responsabilizasaun no kooperasaun.

P. Saida mak KPA? EIP? OEM?

Kada suku hili Ekipa Jestaun Suku (EJS) hodi jere prosesu dezenvolvimentu hodi komunidade nia naran. EJS kompostu husi ekipa tolu, Komisaun Planeamentu no Akontabilidade (KPA), Ekipa Implementasaun Projetu (EIP) no Ekipa Operasaun no Manutensaun (EOM).

KPA

KPA kompostu husi Konsellu Suku tomak, no reprezentante adisionál ida husi kada aldeia ho jéneru labele hanesan ho membru atuál. Ida-ne’e fó garantia hodi reprezenta interese husi mane no feto sira husi aldeia hotu-hotu. Prezidente, Vise-Prezidente no Sekretáriu hetan eleisaun nu’udar Grupu Jestór. KPA iha responsabilidade hodi fiskaliza no monitoriza atividade PNDS en jerál no garante katak membru hotu-hotu husi komunidade iha partisipasaun efetiva.

Konsellu suku, nu’udar tipu governasaun tradisionál ida, inklui Xefe Suku, Xefe Aldeia hotu-hotu, reprezentante foin-sa’e na’in-rua (tinan 17-30), ferik-katuas ida (tinan 60 ba leten) no lia-na’in ida. . Hodi hetan informasaun liután kona-ba papél lideransa tradisionál iha Timor-Leste, haree Lei 3/2009, Lideransa Komunitáriu no sira-nia eleisaun.

EIP

Ekipa Implementasaun Projetu (EIP) iha membru ezekutivu na’in-tolu, prezidente ida, sekretáriu ida no tezoureiru ida. Entre membru ezekutivu sira, tenke iha pelumenus feto ida. Ekipa Implementasaun Projetu (EIP) iha responsabilidade ba dezeñu, planeamentu no implementasaun projetu PNDS.

EOM

Ekipa Operasaun no Manutensaun (EOM) iha membru ezekutivu na’in-tolu: Prezidente ida, sekretáriu ida no tezoureiru ida. Entre membru ezekutivu sira, tenke iha pelumenus feto ida.  EOM iha responsabilidade ba infraestrutura nia operasaun no manutensaun.

P. Oinsá halo selesaun ba EJS (Ekipa Jestaun Suku)?

Komunidade hili Ekipa Jestaun Suku (EJS) ho prosesu demokrátiku liuhosi votasaun segredu.

Uluk liu, kada aldeia organiza sorumutu no nomeia ema ida hodi reprezenta sira-nia aldeia iha KPA (Komisaun Planeamentu no Akontabilidade). KPA kompostu husi Konsellu Suku ne’ebé eziste, no reprezentante adisionál ida husi kada aldeia ho jéneru ne’ebé labele hanesan ho membru atuál. Ida-ne’e fó garantia hodi reprezenta interese husi mane no feto sira husi aldeia hotu-hotu.

Kada aldeia mós nomeia kandidatu sira ba Ekipa Implementasaun Projetu (EIP), Ekipa Operasaun no Manutensaun (EOM) no Fasilitadór Suku sira. Kada aldeia tenke haruka nomeadu mínimu, bazeia ba númeru aldeia iha suku, ne’ebé hatudu iha tabela okos ne’e. Tenke nomeia mane no feto sira ho númeru hanesan.

Grupu jestór sira hetan eleisaun, liuhosi votasaun sekretu, husi membru sira KPA nian entre nomeadu sira husi aldeia hotu-hotu, ne’ebé marka prezensa iha momentu halo votasaun. EIP, no mós EOM, tenke inklui pelumenus feto ida, no entre Fasilitadór Suku na’in-rua tenke iha pelumenus feto ida. Ofisiál sira iha ekipa tolu ne’e (KPA, EIP, no EOM) labele inklui parente sira, no labele mai husi família direta ka uma-kain ne’ebé hanesan. Tenke tau naran husi membru KPA no kandidatu sira ne’ebé nomeadu ba Ekipa Jestaun Suku iha fatin públiku iha kada aldeia.

 

Númeru aldeia iha suku Kandidata feto ba EIP, EOM & Fasilitadór Suku husi kada Aldeia Kandidatu mane ba EIP, EOM & Fasilitadór Suku husi kada Aldeia
1 6 6
2 3 3
3 – 5 2 2
Liu ema na’in-5 1 ka 2 1 ka 2

 

P. Grupu Jestór iha EJS hetan eleisaun ba tempu hira? Suku ida bele troka sira-nia reprezentante?

Eleisaun ba Ekipa Jestaun Suku (EJS) tenke hala’o pelumenus kada tinan 3.

Ekipa nia dezempeñu sei hetan revizaun tinatinan husi komunidade ho asisténsia husi Fasilitadór Sosiál sira Sub-Distritu nian. Revizaun ne’e akontese iha nivel sub-distritu no iha enkontru sosializasaun suku iha tinan oinmai, nu’udar parte husi avaliasaun luan liu kona-ba saida mak hetan susesu no saida mak falla. Se avaliasaun anuál hatudu katak ema barak iha komunidade la kontente ho dezempeñu, tenke halo eleisaun foun, no fó formasaun nesesária ba membru foun sira.

Dalaruma tenke troka membru ekipa tanba membru ida rezigna an, mate, moras, ka razaun seluseluk. Tenke troka membru KPA ho ema ne’ebé iha jéneru hanesan husi aldeia hanesan. Hodi troka membru sira husi EIP, EOM, ka Fasilitadór Suku sira, KPA bele nomeia kandidatu tuir mai bazeia ba klasifikasaun husi votasaun anteriór, ka hala’o eleisaun foun.

P. Sé mak bele simu pagamentu liuhosi PNDS?

Traballadór sira ne’ebé envolvidu iha projetu PNDS bele simu insentivu ida husi PNDS (la’ós saláriu ka vensimentu). EIP (Ekipa Implementasaun Projetu) sei determina montante loroloron, ho konkordánsia husi komunidade.

PNDS enkoraja suku sira atu kontrata membru no badain husi komunidade lokál.  Serbisu ne’e disponivel ba ema hotu-hotu ne’ebé hakarak serbisu (mane no feto hotu). Feto sira simu montante ne’ebé hanesan ho mane sira. Tenke halo esforsu espesiál hodi inklui ema ho defisiénsia ne’ebé hakarak partisipa no serbisu iha projetu ida. Iha kazu exesionál bainhira traballadór treinadu la disponivel iha suku, bele aluga traballadór treinadu husi suku sira ne’ebé besik.

Grupu Jestór ne’ebé eleita ona ba Ekipa Jestaun Suku (EJS) sei simu insentivu mensál ne’ebé ki’ik nu’udar kompensasaun ba tempu ne’ebé sira aloka ba PNDS. Montante ne’ebé sira simu sei depende ba montante serbisu ne’ebé alokadu ba pozisaun refere, favór haree tabela iha okos:

Membru Ekipa Jestaun Suku Insentivu mensál   Nota sira
Prezidente KPA, Vise-Prezidente KPA no Sekretáriu KPA $20 ba fulan ida Só bele selu montante ne’e karik ema refere la’ós membru Konsellu Suku
Xefe EIP, Sekretáriu no Tezoureiru $30 ba fulan ida
Fasilitadór Suku sira $20 ba fulan ida
Xefe EOM, Sekretáriu no Tezoureiru $10 ba fulan ida

Grupu Jestór iha Ekipa Jestaun Suku bele partisipa iha traballu ba projetu nu’udar traballadór la treinadu (ho nune’e bele simu insentivu traballadór nian), maibé só bele halo nune’e bainhira fahe traballu igualmente ho membru komunidade seluseluk.

Insentivu sira sei la selu ba ema ne’ebé sai ona membru Konsellu Suku, inklui Xefe Suku, tanba sira simu ona insentivu husi Governu.

P. Fasilitadór sira Sub-Distritu nian hala’o papél saida de’it?

Fasilitadór sira Sub-Distritu nian nu’udar funsionáriu sivíl ne’ebé serbisu diretamente ho komunidade sira hodi tulun implementa projetu PNDS.

Sira tulun komunidade sira hodi planeia no dezeña projetu, fiskaliza konstrusaun no responsabilizasaun finanseira, no mós fó mentorizasaun, monitorizasaun no avaliasaun. Fasilitadór sira Sub-Distritu nian iha responsabilidade prinsipál hodi fó formasaun ba Ekipa Jestaun Suku (EJS) kona-ba abilidade administrativa no téknika ho nune’e sira bele halo jestaun efetiva ba atividade PNDS.

Iha Fasilitadór Sub-Distritu na’in-tolu ne’ebé diferente: sosiál, tékniku no finansas.

Fasilitadór Sosiál sira

Fasilitadór Sosiál sira Sub-Distritu nian fó apoiu ba jestaun. Sira garante igualdade jéneru no inkluzaun sosiál ba feto, ema ho defisiénsia, no ema sira seluk ne’ebé tradisionalmente sai marjinalizadu. Sira mós monitoriza funsionamentu husi EJS no ajuda ho prosesu avaliasaun dezempeñu ba ekipa hirak-ne’e no sira-nia membru.

Fasilitadór Tékniku sira

Fasilitadór Tékniku sira Sub-Distritu nian tulun komunidade sira hodi deside infraestrutura saida mak sira presiza. Sira tulun komunidade sira hodi harii rasik projetu (sein kontrata empreiteiru sira), ajuda ho proposta, dezeñu, orsamentu no aprovizionamentu. Sira fó formasaun ba membru Ekipa Jestaun Suku kona-ba dezeñu no konstrusaun, no tulun ho formasaun ba ekipa konstrusaun no ekipa serbisu.

Fasilitadór Finansas sira

Fasilitadór Finansas sira Sub-Distritu nian garante katak komunidade sira iha komprensaun klara kona-ba prosesu jestaun finanseira, inklui regra sira kona-ba aprovizionamentu. Sira fó tulun ba Ekipa Jestaun Suku hodi planeia, husu, utiliza no responsabiliza fundu operasionál no infraestrutura ne’ebé simu tiha ona. Sira mós garante katak informasaun atualizada kona-ba finansas ne’ebé fó ba komunidade tenke klaru no fasil atu komprende. Sira haree didi’ak relatóriu finanseiru suku nian hodi verifika despeza, no ajuda ho auditoria ba projetu. Sira mós fó formasaun ba membru Ekipa Jestaun Suku kona-ba jestaun finanseira, sistema kontabilidade no prosesu halo relatóriu.

P. Oinsá prevene korrupsaun? Iha monitorizasaun saida de’it?

PNDS estabelese ona prosesu halo relatóriu finanseiru no monitorizasaun iha nivel oioin, ho objetivu hodi garante katak fundu hotu-hotu tenke uza ho maneira transparente no responsavel.

Monitorizasaun iha nivel komunitáriu

Komunidade iha direitu atu hetan informasaun adekuada kona-ba PNDS, inklui informasaun finanseira, tanba osan ne’e pertense ba komunidade. Kada suku sei hala’o enkontru formál rua kona-ba responsabilizasaun iha kada siklu implementasaun, enkontru dahuluk sei hala’o durante harii projetu, no enkontru daruak sei hala’o depoizde remata projetu. Membru komunidade simu informasaun kona-ba montante osan ne’ebé gasta ona, no osan ne’e gasta ba saida de’it. Membru komunidade hotu-hotu (mane no feto sira) hetan oportunidade atu husu pergunta, hato’o preokupasaun ka halo sujestaun. Durante prosesu implementasaun relatóriu finanseiru mensál sei tau iha kuadru avizu komunidade. Iha objetivu prinsipál hodi garante katak informasaun finanseira ne’e fasil atu komprende ba komunidade tomak.

Karik membru komunidade fiar katak fundu sira uza ho maneira la loos, sira bele kontakta Komisaun Planeamentu no Akontabilidade (KPA) suku nian, ka Komisaun Dezenvolvimentu Distritu (KDD), ka fasilitadór PNDS ida ne’ebé sira fiar.

Responsabilizasaun ba Governu

Kada Ekipa Jestaun Suku (EJS) sei entrega relatóriu finanseiru mensál iha enkontru mensál jestaun nian iha nivel sub-distritu. Bazeia ba dadus ne’e, sei prodús relatóriu regulár ba Ministériu Administrasaun Estatál (MAE) no Ministériu Finansas (MF).

Fasilitadór Finansas sira Sub-Distritu nian no kontabilista PNDS iha nivel distritu halo vizita monitorizasaun regulár ba suku hodi konfirma katak fundu sira hetan jestaun ne’ebé loloos. Sira sei halo verifikasaun aleatória hodi verifika aprovizionamentu no pagamentu seluseluk, no garante katak tranzasaun hotu-hotu iha responsabilizasaun loloos. Bainhira ema la kumpre regra sira, akontesimentu ne’e sei relata kedas ba Koordenadór Distritu PNDS.

Gabinete Inspesaun no Auditoria Interna iha Ministériu Administrasaun Estatál iha responsabilidade atu halo auditoria iha PNDS nia laran. Fundu PNDS bele mós hetan auditoria husi Kamara Auditór husi Tribunal Superior Administrativo, Fiscal e de Contas.

P. Oinsá Governu Austrália apoia PNDS?

Austrália apoia PNDS dezde 2011, no atu fó AUD$ millaun 55 durante tinan lima (2012-2017), ho promete atu AUD$ 40 durante tinan tolu (2014-17).

Osan ne’e sei gasta ba formasaun, konsellu no apoiu tékniku, monitorizasaun no avaliasaun.

Austrália finansia asesór sira ne’ebé serbisu ho Ministériu Administrasaun Estatál, Ministériu Finansas no Komisaun Funsaun Públika hodi dezenvolve no hametin sistema korporativu ne’ebé permite PNDS atu hato’o subsídiu ba suku sira. Ida-ne’e inklui sistema finanseiru, jestaun rekursu umanu, planeamentu serbisu, lojístika no jestaun informasaun.

Iha 2013, Austrália serbisu hamutuk ho organizasaun formasaun sira Timor-Leste nian, hodi fó formasaun ba ema na’in-400 resin hodi serbisu nu’udar Fasilitadór sira Sub-Distritu nian. Iha 2014 Austrália fó mentorizasaun no formasaun ba pesoál PNDS iha distritu hotu-hotu hodi apoia sira-nia serbisu ho komunidade sira.

Austrália no Timor-Leste mós serbisu hamutuk hodi harii sistema monitorizasaun no avaliasaun hodi garante katak programa ne’e hetan susesu.

Liuhosi sira-nia orsamentu anuál, Governu Timor-Leste fornese fundu operasionál no infraestrutura ne’ebé komunidade sira uza ba planeamentu no konstrusaun.