Kona ba PNDS

Programa Nasionál Dezenvolvimentu Suku (PNDS)

Programa Nasionál Dezenvolvimentu Suku (PNDS) mak inisiativa ida hosi Governu Timor-Leste ne’ebé fó kbiit ba komunidade sira atu hili, halo dezeñu no harii projetus infraestruturas eskala ki’ik iha sira-nia suku.  PNDS ne’e lidera hosi Ministériu Administrasaun Estatál (MAE) no Ministériu Finansa (MF) iha parseria ho ministériu sira seluk.

Suku sira simu subvensaun anuál ida ho montante entre US$40,000–US$70,000 diretamente hosi Governu hodi halo planu, harii no maneja rasik sira-nia projetus infra-estruturas eskala ki’ik tuir suku nia prioridades dezenvolvimentu.  Infra-estrutura ne’ebé bele harii ka renova inklui sistema bee, estrada lokál, sentru komunitáriu ka eskola sira.

PNDS habele komunidade sira atu partisipa iha no maneja rasik sira-nia dezenvolvimentu. Komunidade sai-na’in no lideransa mak sentrál ba programa ne’e.  PNDS buka atu kria oportunidades serbisu iha área rurál sira no harii membru komunidade sira-nia abilidades iha konstrusaun, aprovizionamentu no akontabilidade.  Komunidade sira hetan apoiu hosi fasilitadór treinadu sira iha área jestaun finanseira, enjiñaria no konstrusaun, no inkluzaun sosiál.

Governu Timor-Leste antisipa atu gasta miliaun US$294.3 ba PNDS iha tinan 8 nia laran hosi tinan 2012 – 2020.

Propózitu

PNDS implementa Governu Timor-Leste nia kompromisu atu hadi’ak povu nia padraun moris, liuliu iha área rurál sira.  PNDS sei aumenta dezenvolvimentu rurál liuhosi finansiamentu ba infra-estrutura bázika, fó serbisu no treinamentu. Infra-estrutura esensiál atu fornese ba povu asesu ba sistema transporte nasionál, servisu saúde no edukasaun, no loke komérsiu lokál.

Atór sira ne’ebé importante liu iha PNDS mak komunidade sira, no sira mak iha kontrolu totál ba avaliasoens, desizoens, planeamentu, implementasaun no rezultadus.

Planu Dezenvolvimentu Estratéjiku Nasionál (2011-2030)

PNDS aliña tuir Timor-Leste nia Planu Dezenvolvimentu Estratéjiku Nasionál (2011-2030).   Planu ne’e identifika Timor-Leste nia prioridades dezenvolvimentu ekonómiku no sosiál.  Nia buka atu dezenvolve programas desentralizadas foun ne’ebé foka ba dezenvolvimentu lokál iha nivel komunidade iha suku no aldeia.  Foku xave ida mak atu aumenta partisipasaun no envolvimentu sidadaun iha dezenvolvimentu lokál.

Diversidade no envolvimentu komunidade

Suku sira sei hahú liuhosi hili ekipa jestaun komunitária ida hodi implementa PNDS. PNDS nia prosesu buka atu envolve komunidade tomak – mane no feto sira, foin-sa’e no katuas-ferik, no grupu sira ho sósiu-ekonómiku la hanesan – iha planeamentu, foti desizaun, implementasaun, operasaun no manutensaun infra-estrutura lokál.  Prioridade ida hosi projetu ne’e mak atu harii infra-estrutura ne’ebé presiza no uza hosi komunidade tomak, inklui feto sira, katuas-ferik no ema defisiente sira.

PNDS fó importánsia boot ba feto sira-nia papél. Programa ne’e buka atu envolve feto sira iha kada faze hosi siklu implementasaun no defini ona 40% nu’udar alvu partisipasaun ba feto sira iha faze prinsipál sira iha siklu projetu ne’e.  Feto sira sei reprezenta iha komité eleitu sira no kada suku sei halo reuniaun ba feto sira de’it hodi sujere, konsidera no klasifika proposta projetu sira.  Pelumenus ida hosi projetu suku sira ne’ebé implementa ona tenke bazeia ba sujestaun no prioridade hirak ne’ebé identifika ona hosi feto sira.  Enkoraja feto sira atu serbisu iha konstrusaun projetu, no mós serbisu nu’udar fasilitadór tékniku, finanseiru no sosiál.

Siklu implementasaun

PNDS iha siklu anuál ida ho etapa 12.

  1. “Sosializasaun” iha nivel distritu no sub-distritu
    Reuniaun komunidade sira iha nivel distritu no sub-distritu garante lider komunitária sira komprende oinsá mak PNDS la’o, no sira-nia papél iha prosesu ne’e.
  2. “Sosializasaun” iha nivel suku no aldeia; selesaun ba ekipa jestaun suku no fasilitadór suku sira
    Reuniaun komunidade sira iha nivel suku esplika PNDS ba populasaun tomak inklui sira-nia papél iha prosesu foti desizaun, no hahú ho eleisaun ba ekipa lokál ida hodi maneja projetu iha sira-nia suku.
  3. Loke konta bankaria no transfere 100% hosi fundu operasionál
    Fundus operasionais fó kbiit ba komunidade atu halo reuniaun sira no traballu preparatóriu sira seluk.
  4. Treinamentu ba ekipa jestaun suku no fasilitadór suku sira
    Pesoál PNDS nian fó treinamentu iha: jestaun finanseira no akontabilidade; planeamentu projetu, jestaun no monitorizasaun; inkluzaun sosiál no igualdade jéneru.
  5. Deside prioridades suku no aldeia
    Suku sira identifika no klasifika sira-nia prioridades; inklui propostas hatama hosi reuniaun feto sira de’it.
  6. Preparasaun no verifikasaun ba proposta projetu
    Hili prioridade prinsipál sira no dezenvolve proposta projetu, iha ligasaun ho pesoál distritu hosi ministériu relevante (hanesan edukasaun, saúde).
  7. Prepara planu detalladu
    Fasilitadór sira tulun ekipa suku sira halo planu orsamentu ba materiais, kustus no periódu tempu ba konstrusaun infra-estrutura. (Prefere liu fornesedór no traballadór lokál sira).
  8. Finaliza kontratu ho komunidade, no implementa projetu
    Proposta projetu finál ne’e asinadu ba iha kontratu ida entre PNDS nia ekipa jestaun komunitária no reprezentante governu lokál sira.
  9. Transfere primeiru prestasaun hosi fundus infra-estrutura (50%), no hahú konstrusaun
    Hafoin asina ona kontratu komunidade ne’e, suku ne’e iha asesu ba metade primeira hosi fundus infra-estruturas.
  10. Halo reuniaun responsabilizasaun, no transfere fundus infra-estrutura ikus (50%)
    Fasilitadór sira presiza halo reuniaun responsabilizasaun regulár ho komunidade no tau relatórius iha kuadru avizu durante prosesu konstrusaun, atu nune’e bele simu segundu prestasaun hosi fundus infra-estrutura.
  11. Kompleta konstrusaun, no entrega ba ekipa operasaun no manutensaun
    Komunidade maneja manutensaun hosi infra-estrutura foun inklui kustu iha futuru.
  12. Hala’o reuniaun responsabilizasaun ikus, halo auditória no avaliasaun.

Iha tinan hirak foufoun, implementa ona PNDS iha faze tolu atu bele maneja liután.

Projetus infra-estruturas suporta hosi PNDS

Suku vota sira-nia nesesidades prioritárias, hili hosi menu atividades ida suporta hosi PNDS.
Atividades hirak-ne’e inklui:

  • Asesu ba infra-estrutrua, inklui estrada lokál, pontes, dalan, kais, nsst.
  • Suku nia sistema bee sira ne’ebé ki’ik, simples (purezemplu sistema gravidade, posu, kaptasaun udan-been, no protesaun bee-matan), no bele inklui instalasaun fase nian. Permite mós instalasaun saneamentu nu’udar parte hosi instalasaun públika.
  • Irigasaun no drenajen, inklui barrajen, kanál sira, portaun sira nsst.
  • Estensaun, renovasaun ka reabilitasaun eskola lokál sira, purezemplu, aumenta sala eskola nian, instalasaun sentina, mobiliárius no ekipamentu.
  • Konstrusaun ka reabilitasaun krexe no jardín-infánsia, inklui instalasaun sentina, mobiliárius no ekipamentu.
  • Estensaun, renovasaun ka reabilitasaun klínika/postu saúde lokál, inklui purezemplu, mobiliáriu, kakuluk, pinta, ekipamentu báziku, instalasaun bee no saneamentu.
  • Uma ba mestre/a sira no knaar-na’in saúde sira lokaliza hamutuk ho eskola ka klínika sira
  • Sentru komunitáriu multi-propózitu, maibé sentru komunitáriu multi-propózitu ida de’it mak bele harii iha kualkér suku iha siklu ínisiu haat hosi programa PNDS tinan 8 ne’e.
  • Instalasaun públika ho eskala ki’ik sira seluk iha komunidade mak hanesan merkadu lokál, fornesimentu eletrisidade, halimar fatin ba labarik sira, no instalasaun desportiva.

Estrutura governansa

PNDS mak inisiativa ida hosi Governu Timor-Leste, lidera hosi Ministériu Administrasaun Estatál (MAE) no Ministériu Finansa (MF).

Programa ne’e iha nivel pesoál governu oin-oin hosi nivel ministériu to’o sub-distritu.  Pesoál PNDS sira nu’udar funsionáriu públiku no simu saláriu hosi Governu Timor-Leste.

Komité Inter-Ministeriál ida no Grupu Traballu Tékniku Inter-Ministeriál (GTTIM) mak superviziona programa ne’e.  Grupu Traballu Tékniku Inter-Ministeriál (GTTIM) prezide hamutuk hosi Ministériu Administrasaun Estatál no Ministériu Finansa no inklui Ministériu sira hosi Saúde, Edukasaun, Infra-estrutura, Agrikultura no Peska, no Ajénsia Dezenvolvimentu Nasionál. GTTIM nia papél mak garante:

  • dezenvolvimentu no implementasaun loloos ba PNDS
  • alokasaun fundus tuir tempu ba suku sira, no
  • supervizaun ba alokasaun rekursus hodi implementa PNDS tuir ninia objetivus no prinsípius.

Programa ne’e maneja hosi Sekretariadu Programa Nasionál ida iha Ministériu Administrasaun Estatál. Sekretariadu ne’e fó asisténsia téknika no maneja dezeñu no planeamentu programa.  Sekretariadu ne’e mós fó apoiu ba koordenadór distritu sira no pesoál sub-distritu.

Koordenadór distritu sira halo vizita kampu regulár ba suku hodi monitoriza progresu.  Sira garante programa ne’e implementa tuir prinsípius prinsipais, no tuir oráriu. Sira informa ba Sekretariadu kualkér atrazu, problema implementasaun no sira-nia solusaun, ho atensaun liuliu ba feto sira no grupu marjinalizadu sira-nia partisipasaun, no kestoens transparénsia.

Pesoál sub-distritu sira tulun sira-nia komunidades ho planeamentu no dezeñu projetus, supervizaun ba konstrusaun no responsabilizasaun finanseira, no mós mentoring kontínuu, monitorizasaun no avaliasaun.  Ida-ne’e harii kompreensaun no apoiu ba komunidade nia partisipasaun no harii membru komunidade sira-nia abilidades.

Estrutura komunidade

Estrutura administrativa (governu lokál) iha Timor-Leste fahe ba distritu 13, ho sub-distritu 65, suku 442 no aldeia 2250.

Xefe Suku no Konsellu Suku iha funsaun lideransa trandisionál iha Timor-Leste, no sira mós kaer papél importante ida iha PNDS.  Sira lidera sosializasaun no enkoraja partisipasaun feto no mane sira, superviziona eleisaun demokrátika hosi ekipa komunitária sira no tulun rezolve keixas ho justu.

Atu implementa PNDS, kada suku hili demokratikamente Ekipa Jestaun Komunitária ida ne’ebé inklui:

  • Komisaun Planeamentu no Akontabilidade (KPA) responsabiliza ba supervizaun no monitorizasaun jerál ba atividades PNDS no garante partisipasaun komunidade ne’ebé efetivu hosi membru hotu-hotu iha komunidade.  (Konsellu Suku tomak mós hola parte ba iha KPA.)
  • Ekipa Implementasaun Komunidade (EIP) responsabiliza ba dezeñu, planeamentu no implementasaun atividades PNDS.
  • Ekipa Operasaun no Manutensaun (EOM) responsabiliza ba planeamentu no maneja manutensaun no funsionamentu infra-estrutura foun sira ne’ebé harii ona liuhosi Subvensaun Suku nian.
  • Fasilitadór Suku rua ne’ebé liga ho pesoál PNDS, tulun mobiliza komunidade, no tulun komunika kona-ba PNDS nia atividade no desizaun sira.

Programa Apoiu ba PNDS

PNDS mak programa ida hosi Governu Timor-Leste.  Programa ne’e suporta hosi Governu Austrália ne’ebé fó asisténsia téknika, apoiu lojístiku no treinamentu, plus asisténsia ho monitorizasaun no avaliasaun.

Programa Apoiu ba PNDS maneja hosi Cardno Emerging Markets hodi naran Governu Austrália nian.  Cardno mak kompañia internasionál ida serbisu kona-ba enjiñaria sivil ne’ebé inklui mós infra-estrutura, servisu ambientál no programas dezenvolvimentu internasionál.

Informasaun liután kona-ba Ajuda Austráliana nia apoiu ba PNDS bele hetan iha DFAT nia website

Ho tempu Governu Timor-Leste sei fó liután ka selu kustu hotu-hotu ba treinamentu no asisténsia téknika.

Ba informasaun liután, favor haree Husu no hatan, ka download PNDS nia manuál operasaun programa kompletu.