DG aprezenta progresu PNDS iha TVTL
Coo-Chefia/Diretor Geral Dezenvolvimentu Lokál, Miguel Pereira de Carvalho, fahe informasaun progresu PNDS ba públiku liu husi talk show, iha TVTL (26/08/2014).
Miguel Pereira de Carvalho iha programa talk show ne’e informa katak : “PNDS implementa fazeadamente, faze pilotu implementa iha Suku 30, Faze dahuluk implementa iha Suku 149, faze ba daruak implementa iha Suku 91 no faze ba datoluk hanesan faze ikus implementa iha suku 202, signifika katak suku hotu iha territóriu involve no implementa ona PNDS”. Nia hatutan katak :
“Faze ba dahuluk komesa ona ho konstrusaun, faze daruak prepara planu detallu ba sira nia projetu, no faze ba datoluk foin hahú ho sosializasaun iha nivel Suku ho Aldeia, no forma ekipa Jestaun suku no suku balu loke ona konta bankária suku”.
PNDS iha ninia siklu ba tinan ida, iha siklu ne’e iha etapa 1-12 mak sai hanesan atividade prinsipál ba komunidade suku hotu tenke la’o tuir.
Mericio Akara, hanesan Diretór ezekutivu husi NGO Luta hamutuk ne’ebé sai mós oradór ba diskusaun ne’e apresia ho programa governu ninia ne’ebé implementa liu husi PNDS, maibé nia rekomenda ba sekretariadu tékniku PNDS tantu husi nasionál, distritu nomós sub-distritu katak :
“Presiza fó asistensia tékniku ho masimu atu nune’e komunidade sira bele implementa no jere programa ne’e ho di’ak iha suku hotu tuir mata dalan ne’ebé iha”.
Iha talk show ne’e oradór nain rua mak prezensa, ida mak Miguel Pereira de Carvalho hanesan Diretór Geral Dezenvolvimentu Lokál, husi SEDL/MAE no oradór ida seluk, Mericio Akara, hanesan Diretór Ezekutivu husi NGO Luta Hamutuk hanesan mós reprezenta sosiedade sivíl.
Programa talk show ne’e realiza tanba iha kooperasaun entre PNDS ho RTTL.
