Loron 18 Junhu 2014: Vice Primeiru Ministru Dr. Fernando Lasama inaugura projetu PNDS rua iha Suku Humboe, Sub-Distrito Ermera. Iha Suku Humboe komunidade deside bee mós ho sentru komunitáriu multi propózitu mak sai hanesan sira nia prioridade aas liu, no hetan finansiamentu husi orsamentu ne’ebé aloka ba Suku liu husi PNDS.
Sentru komunidade multi propózitu foun iha Humboe
Iha diskursu ba komunidade no bainaka sira, Vice PM hateten, “Ita hahú buat ida ona, buat ne’ebé imi halo rasik. Imi mak deside saida mak imi presiza iha ne’e, urjente liu ba iha ne’e, liu husi mekanizmu [PNDS nian]… to’o rezultadu di’ak.”
Nia dehan tan, “Ne’e buat avansa boot ida. Fó konfiansa ba ita hotu, katak buat hotu la’ós karu … ita ba halo buat ruma ne’ebé di’ak, ho kustu ne’ebé maka la’ós aas tebetebes. Parabéns ba ita hotu, ba governu, autoridades lokál, no komunidade.”
Suku Humboe depois de ukun an projetu barak mak tama ona tantu husi governu nomós ajénsia ne’ebé mak sai hanesan parseiru ba dezenvolvimentu nasaun ninian. Maibé iha implementasaun projetu hirak ne’e implementa direita husi setór privadu.
Calistro Madeira hanesan komunidade ne’ebé involve iha Ekipa Jestaun Suku no sai hanesan presidente ba Komisaun Planeamentu Akontabilidade hatete: “Ami orgullu ho programa PNDS tanba liu husi programa ida ne’e ami bele dezenvolve ami-nia Suku. Iha implementasaun projetu PNDS ami komunidade mak identifika prioridades, halo planu no implementa inklui mobiliza materiais konstrusaun, jere rasik ami orsamentu nomós halo manutensaun.”
Reprezentante husi Australian Aid, Vincent Ashcroft, mós fó parabéns ba ema hotu ne’ebé serbisu iha PNDS, inklui Ministru Estatál no Ministru Finansas ne’ebé serbisu hamutuk ho asesór sira ne’ebé fundu husi Australia, “To’o iha fulan Augustu suku hotu iha territóriu sei ativu ho programa PNDS, ne’e maka realizasaun boot tebetebes. Imi bele sente orgullu tebes, no ami orgullu atu serbisu hamutuk ba programa importante ne’e.” Vice PM mós fó agradese ba apoiu husi Governu no povu Australia ne’ebé ajuda PNDS: “Kooperasaun ne’e kapás, imi komprende duni saida mak ami presiza no mós bele realiza apoiu ne’e. Obrigado barak ba maun alin sira iha Australia.”
Suku Humboe – , total subsídiu annual hamutuk $45,000.00. Fundus operasionál ho montante $5,250.00, fundus infraestrutura ho montante $39,750.00.
Konstrusaun bee mos – $23,749.43
Konstrusaun Sentru Komunitaria Multi Propózitu – $15,966.68
Komunidade ne’ebé mak hetan benefísiu husi projetu rua ne’e hamutuk xefe de família iha hitu nulu resin rua no populasaun hamutuk atus tolu lima nulu resin.
-
- Vice Prime Minister Dr. Fernando Lasama no Reprezentante husi Australian Aid, Vincent Ashcroft, tesi fita iha sentru komunidade foun.
-
- Vice Prime Minister Dr. Fernando Lasama loke bee mós foun, ho Reprezentante husi Australian Aid, Vincent Ashcroft.
-
- Sentru komunidade multi propózitu foun iha Humboe
