Vice Ministru da Administrasaun Estatal, Tomas do Rosario Cabral, Asina Plaka Projetu simbolu inagurasaun ba projetu Extensaun sala eskola iha Suku Orlalan, Postu Administrativo Laklubar Munisipiu Manatutu
Inagurasaun projetu PNDS ba extensaun sala eskola Primaria Polaka iha Suku Orlalan, Postu Administrativo Laklubar Munisipiu Manatutu mak hanesan inagurasaun ofisiál ba projetu PNDS husi Fase I no Fase II hamutuk 42 ne’ebé implementa iha Munisipiu Manatutu. Projetu hirak nee ofisiál inagura husi Vice Ministru da Administrasaun Estatal Tomas do Rosario Cabral (22/10/2015).
Vice Ministru da Administrasaun Estatal, Tomas do Rosario Cabral hafoin inagura projetu hodi halo mos inspeksaun ba fasilidades ne’ebé perpara ona, husu ba komunidade no parte eskola atu kuidadu didiak fasilidades hirak nee bele dura to’o tempu naruk hodi utuliza ba prosesu aprendijajen alunus sira iha eskola ho diak.
Tuir Vice Ministru Iha mudansa Politika implementasaun programa, Administrador Postu mak sai nain ba Programa nee no Administrador Munisipiu mak sai hanesan koordenador ba implementasaun programa nee iha Munisipiu, atu nunee Administrador postu sira hatene katak programa nee hala’o duni iha suku laran.
Projetu Extensaun Sala Eskola Polaka, iha Suku Orlalan Postu Administrativo Laklubar, Munisipiu Manatutu neebe hetan Inagura husi Vice Ministru da Administrasaun Estatal, Tomas do Rosario Cabral
Vice Ministru hateten programa PDIM no PNDS hanesan programa rua ne’ebé integrado ho programa Desenvolvimento Integrado Munisipal. Tanba nee programa PDIM tengki hakbesik ba programa PNDS atu bele reforsa programa PNDS hodi responde difikuldades ne’ebé komunidade sira enfrenta.
Entretanto Chefe da eskola Primaria Polaka, Jasinto Sarmento ne’ebé nudar mos komunidade iha suku nee, hato’o agradese ba governo tanba bele responde ona komunidade nia difikuldades, liu –liu falta de sala eskola. Hanesan komunidade Sente kontente tanba antes nee sira falta fatin hodi hala’o prosesu aprendijajen, nune’e parte eskola tengki fahe tempu ba labarik sira hala’o prosesu apredijajen iha oras dader no lokraik maibé ho programa PNDS difikuldades hirak nee bele ona rejolve.
Ho inagurasaun projetu extensaun sala eskola iha Suku Orlalan, maka projetu hotu ne’ebé implementa iha Munisipiu Manatutu iha faze I no faze II termina ona hodi ofisiál entrega ba komunidade.
