Komisariu Adjunto PNTL, Faustino da Costa Akompanha Husi Administrador Munisipiu Aileu, no Reprezentante Embaisada Nova Zelandia koa Pita simbolu inagurasaun OPS Suku Seloi Craik, Munisipiu Aileu
Uma Ofisiál Polísia Suku (OPS) ne’ebé konstrui iha suku Seloi Kraik Postu Administrativo Aileu Vila, Munisípiu Aileu inaugura husi segundu komandante PNTL akompanha husi Administrador Munisípiu Aileu. Iha loron 31 Agusto 2018
Segundu komandante PNTL Komisáriu Polísia Faustino da Costa iha nia intervensaun hato’o agradesimentu ba governo Nova Zelandia tanba ho apoiu ne’ebé sira fo PNTL liu husi Ministeriu Administrasaun Estatal, ne’ebé Sekretariado Tekniku PNDS mak hala’o konstrusaun uma ofisiál polísia suku, iha suku Seloi Kraik ho kualidade di’ak.
Tuir Komisariu Faustino da Costa ho apoiu orsamentu hodi konstrui uma inklui fasilidade balun ne’e bele ajuda fasilita ona PNTL nia membru sira hodi hala’o knar atendementu ba komunidade iha areia rural ho di’ak.
Amo paroku Aileu fo bensaun ba uma OPS, Suku Seloi Craik
Augusto Ferreira Soares ne’ebe reprejentante Embaisada Nova Zelandia iha serimónia inagurasaun nee fo esperansa katak governo Nova Zelandia liu husi Embaisada Nova Zelandia iha Timor Leste sei esforsu atu kontinua apoiu PNTL iha aspetu hari’I uma OPS to’o iha 2020.
Iha oportunidade hanesan Administrador Munisípiu Aileu no Chefe Suku Seloi Kraik hato’o agradesimentu ne’ebé profundu ba Governo Nova Zelandia, Komando Geral PNTL inklui Sekretariado Tekniku PNDS tanba ho esforsu tomak ne’ebé iha bele konklui ona konstrusaun uma OPS nee. tuir lideransa lokal sira katak uma ho fasilidade ne’ebé iha bele fasilita membru polísia OPS hodi hela metin iha fatin atu bele fo asistensia ba komunidade iha suku Seloi Kraik.
Serimónia inaugurasaun uma OPS ne’e remata ho bensaun husi amu lulik inklui ofisialmente entrega savi husi segundu komandante PNTL, komisario Faustino da Costa ba komandante PNTL Munisípiu Aileu nudar símbolu patrimoni PNTL Munisípiu nian ne’ebé sei uza hodi hala’o atividade polisiamentu komunitariu iha suku Seloi Kraik.
