Jalaluddin Hameéd, nu’udar assessor ba iha MIS, halo introdusaun kona-ba sistema MIS ne’ebe mak foin estabelse
Atu hadi’ak liu tan jestaun oinsá atu jere didi’ak dadus kona-ba asuntu sosiál, finansas nomós asuntu tékniku husi munisípiu 12 ho RAEOA ba implementasaun programa PNDS, sekretariadu Tékniku Programa Nasionál Dezenvolvimentu Suku (ST-PNDS) liu husi MIS (Management Information System) realiza treinamentu ba Kordenadór PNDS husi Munisípiu 12, RAEOA ho Xefe Departamentu iha salaun MPIE, Fatuhada-Dili (30/11/2015).
Dulce Guterres Junior, nu’udar diretora programa PNDS, iha ninia intervensaun hatete katak:
“Treinamentu ida ne’e hanesan parte ida atu dezenvolve no aumenta tan Kordenadór munisípiu sira nia abilidade liu-liu iha area Jestaun Sistema Informasaun (MIS), atu nune’e bele jere di’ak liu tan dadus kona-ba implementasaun programa iha ida-idak nia munisípiu.”
Kordenador Munisipiu sira, antuzias tebes simu materia treinamentu kona-ba MIS
Jalaluddin Hameéd, nu’udar assessor ba iha MIS hamutuk ho nia ekipa fasilita treinamentu ida ne’e ho di’ak tebes, alende halo introdusaun jerál kona-ba oinsá atu jere dadus programa ninia iha sistema baze de dadus nomós halo simulasaun ou pratika oinsá munisípiu ida-idak bele organiza no hatama dadus iha sistema ne’ebe dezenvolve ona husi MIS.
Treinamentu ida ne’e hetan apresiasaun husi partisipante sira, tanba bele dezenvolve tan kapasidade iha area ida ne’e liu-liu atu jere dadus informasaun iha sistema ne’ebe estabelese ona husi MIS.
Ekipa MIS nasional fasilita hela Kordenador Munisipiu sira, oinsa atu sumariu relatoriu iha sistema MIS
Programa treinamentu ne’e partisipa husi Kordenadór PNDS husi Munisípiu 12 ho Rejiaun Espesiál Oe-Cusse, inklui Xefe Departamentu, Funsionáriu PNDS Nasionál nomós hetan observasaun husi parseiru sira ne’ebé durante ne’e fó sira nia apoiu ba implementasaun Programa PNDS.
