ST-PNDS Realiza Treinamentu Ba Fasilitador Tékniku Postu Administrativu

Atu melhora liu tan servisu iha area tékniku iha suku no aldeia, Sekretariadu Tékniku Programa Nasionál Dezenvolvimentu Suku (ST-PNDS), realiza Treinamentu ba Fasilitador Tékniku Postu Administrativu (FTPA) kona-ba Planeamentu no Jestaun Obra, hanesan Eletrisidade, Konstrusaun no Ponte Kiík iha Centro Nasionál de Emprego e Formaçao Profissional (CNEFP), Tibar (31/08/2015).

Direktur Interno PNDS, Rosito Guterres halo intervensaun hodi abertura treinamento ba fasilitador tekniku Postu Administrativo sira

Rosito Guterres, nu’udar reprezentante Diretora PNDS ofisialmente loke treinamento ba fasilitador tekniku Postu Administrativo sira durante loron 10

Treinamentu ne’e nia objetivu atu aumenta koñesimentu FTPA sira nia liu-liu iha area Tékniku espesialidade atu nune’e bele hala’o servisu ho efisiensia no efikásia iha suku no aldeia. Matéria treinamentu hirak ne’ebé hetan iha treinamentu ne’e sai hanesan bukae ida ba FTPA sira, atu nune’e bele fasilita komunidade sira hodi garantia kualidade projetu infraestrutura bázika ne’ebé implementa direita husi komunidade.

Sr. Rosito Guterres, Xefe Departamentu Monitoring no Avaliasaun, nu’udar Diretór Interinu PNDS, iha ninia intervensaun hatete katak treinamentu ida ne’e importante tebes ba fasilitadór tékniku Postu Administrativu sira.

“Treinamentu ne’e hanesan parte ida atu dezenvolve no aumenta tan Fasilitador Tékniku Postu Administrativu nia abilidade liu-liu iha area tékniku, atu nune’e bele fasilita komunidade sira iha Suku ho di’ak liu tan”, Rosito Guterres, Xefe Departamentu M&A.

Treinamentu ida ne’e hala’o durante loron 10, hahú husi loron 31 Agostu to’o iha loron 11 fulan Setembru 2015. Total FTPA sira ne’ebé partisipa iha treinamentu ne’e hamutuk ema 33, mai husi Munisípiu 12 ho Região Administrativa Especial Oé-cusse Ambeno (RAEOA), liu-liu iha Postu Administrativu ne’ebé ninia suku implementa Programa PNDS iha faze 3.

 

 

 

 

 

 

 

 

 

 


Lian / Language