Vise Ministru Estal, Sr. Tomas R. Cabral, fo hela intervensaun iha Reflesaun annual ba implementasaun programa PNDS iha, Meti-Aut, Dili.
Atu hadi’ak liután implementasaun programa PNDS iha tinan 2016, Sekretariadu Tékniku-Programa Nasionál Dezenvolvimentu Suku (ST-PNDS) realiza reflesaun annual ba implementasaun programa PNDS tinan 2015 liu husi natal hamutuk ho funsionáriu PNDS tomak, iha Restaurante Timor Top, Meti-Aut-Dili (11-12-2015).
Reflesaun ida ne’e realiza ho nia objetivu atu halo avaliasaun ba prestasaun servisu liu-liu kona-ba susesu ne’ebé hetan nomós dezafiu sira ne’ebé ita enfrenta iha implementasaun programa PNDS iha tinan 2015 nia laran.
Vice Ministru da Administrasaun estatál, Tomás do Rosário Cabral, partisipa iha serimónia ne’e hatete katak xave importante atu fó susesu ba iha implementasaun programa PNDS mak dezenvolve liña kordenasaun servisu ne’ebé forte, harmonizasaun, amizade, loyal tantu entre funsionáriu PNDS iha nivel nasionál, munisípiu, postu administrativu nomós ho autoridade lokál iha munisípiu, postu administrativu nomós lider komunitáriu sira iha nivel suku.
Diretora PNDS, Dulce Guterres Junior, Fasilita hela reflesaun annual ba implementasaun programa PNDS.
Jeralmente iha atividade ida ne’e hala’o ho grupu diskusaun, grupu hirak ne’e kompostu husi : Kordenadór Munisípiu, enjeñeiru, FFPA, FTPA, FSPA inklui mós ekipa PNDS nasionál nomós ekipa apoiu terrenu (FST). Asuntu ne’ebé diskute kle’an liu iha grupu ida-ida mak kona-ba jestaun no lideransa, tanba asuntu rua ne’e mak sai hanesan pilár importante iha implementasaun programa PNDS iha territóriu.
Iha diskusaun grupu ida-idak halo apresentasaun, iha aprezentasaun ne’e nota katak maske hetan dezafiu oi-oin durante implementasaun programa PNDS iha tinan 2015 nia laran, maibé ida ne’e la’os sai hanesan obstákulu ida ba ekipa PNDS, maibé ida ne’e hanesan lisaun ida pozitivu tebes ba funsionáriu PNDS hotu oinsá atu aprende no bele hadi’ak dezafiu hirak ne’ebé enfrenta liu-liu iha parte jestaun no lideransa ninia, atu nune’e iha tinan 2016 ita bele hetan susesu liu tan iha implementasaun programa PNDS.
Hafoin hala’o avaliasaun ba meilloramentu prestasaun servisu, iha parte loro-kraik selebra natal hamutuk hahú ho misa liturjia da palavras, ne’ebé dirije direita husi amo Alberto Laek SVD, hafoin misa remata, iha parte kalan serimónia han hamutuk no kontinua ho divertimento.
Partisipante ne’ebé partisipa iha serimónia ne’e funsioanriu PNDS hotu husi nasionál, munisípiu nomos postu administrativu, Vise Ministru Estatál, Diretór Jeral ADN Samuel Marçal, Diretóra Lidia Sousa husi Ministériu, Assessor Internasional no nasionál nomós Ekipa Suporta Terrenu (Field Support Team (FST)) husi Ajensia Cardno ne’ebe durante ne’e fó apoiu ba implementasaun programa PNDS .
-
- Diretora DNDF, Lidia de Sousa Guterres, partsipa mos iha reflesaun annual programa PNDS ba tinan 2015
-
- Funsionariu PNDS tantu nasional nomos distritu rona hela apresentasaun husi diskusaun ne’ebe ekipa ida-idak hala’o.
-
- Domingas Gilpia da C. Soares, reprezentante FTPA apresenta hela rezultadu diskusaun
-
- Diretor Delegasaun PNDS husi Munisipiu 12 ho RAEOA
-
- Diretor Delegasaun husi Munisipiu Liquisa, halo hela intervensaun iha reflesaun annual no natal hamutuk
-
- Diretora PNDS, aprezenta hela ekipa ne’ebe servisu hamutuk iha PNDS nasional
