Diretora Dulce Guterres, fo ninia intervensaun iha Sorumutu nasional-Forum Operasaun no Manutensaun
Sekretariadu Tékniku Programa Nasional Dezenvolvimentu Suku (ST-PNDS) organiza Sorumutu hamutuk ho Diresaun Nasional Servisu de Agua (DNSA) ho nia objetivu atu hametin liu tan liña kordenasaun servisu iha parte operasaun no manutensaun iha area rural iha territóriu. Sorumutu ida ne’e hala’o iha Hotel Ramelau, Ai-mutin-Dili, Iha loron 27 Fulan Juñu 2017.
Diretora PNDS, Dulçe Guterres Junior, kontente ho atividade ne’e, iha ninia intervensaun hatete katak : “Sorumutu ida ne’e importante tebes tanba bele hamosu akordu ida atu servisu hamutuk entre PNDS ho DNSA iha parte operasaun no manutensaun ba bee mos ne’ebé implementa liu husi Programa PNDS.”
Iha parte seluk, Martinus Nahak, Chefe Departamentu husi DNSA, hanesan mos reprezentante Diretór DNSA mensiona katak : “Sorumutu ida ne’e hanesan pasu pozitivu ida atu hametin liu tan liña kordenasaun entre DNSA ho PNDS atu nune’e bele garantia sustentabilidade bee mos iha komunidade nia leet.”
Diretor SAS Munisipiu Ermera, fo hela ideia kona-ba Operasaun no manutensan ba bee mos iha area rural
Sorumutu ida ne’e realiza bazeia ba rezultadu atividade Konjunta ne’ebé involve ST-PNDS ho DNSA kona-ba operasaun no manutensaun ba sistema bee mos iha Munisípiu Bobonaro, Baucau no Ermera, indika katak komunidade ne’ebé hanesan benefisiáriu programa, apresia tebes ho projetu sistema bee mos ne’ebé komunidade implementa liu husi programa PNDS nomos ajénsia sira seluk, maibé sira preokupa tebes oinsá atu bele garantia sustentabilidade. Iha sorumutu ne’e hamosu duni akta ida entre ST-PNDS ho DNSA atu nune’e kolabora liu tan iha futuru mai hodi responde ba iha preokupasaun liu-liu iha parte operasaun no manutensaun ba bee mos iha komunidade nia let.
Partisipante sira ne’ebé partisipa iha eventu ida ne’e hamutuk ema tolu nolu (30) resin, kompostu husi Diretór PNDS ho SAS husi Munisípiu 12, Chefe departamentu ho tékniku PNDS husi nasional no inklui asesór sira husi ajénsia Cardno ne’ebé durante ne’e fo apoiu iha programa PNDS.
