Partisipantes sira konsentra los simu materia husi fasilitador treinamentu
Atu melhora liu tan servisu sosiál no tékniku iha Suku no Aldeia, Sekretariadu Tékniku Programa Nasionál Dezenvolvimentu Suku (ST-PNDS), realiza treinamentu ba Fasilitador Sosiál Postu- Administrativu 78, husi Munisípiu 12 nomós Região Administrativa Especial Oé-cusse Ambeno (RAEOA)
Objetivu husi treinamentu ida ne’e maka hala’o Treinamentu ba Treinadór(TOT) no Sertifikadu Nasionál Nivel 3 kona ba Fasilitasaun Komunidade ne’ebe hetan akreditasaun husi INDMO ( Institutu Nasionál Dezenvolvimentu Mão de Obra). Sertifikadu Nasionál Nivel 3 kona ba Fasilitasaun Komunidade ne’e primeira ves implementa iha Timor –Leste, ne’ebe inisia husi PNDS.
Treinamentu ba Fasilitador Sosiál Postu Administrativu ne’e fahe ba fase 3 ( Fase Primeiru hahú iha dia 25-29 Maiu 2015, Fase 2 hahú iha 8–12 Juñu 2015 no Fase ikus liu ba FSPA sira iha loron 22 -26 de Juñu 2015).
Iha Treinamentu ne’e sira aprende skill barak kona ba :
- Oinsá identifika nesesidade Komunidade utiliza analiza SWOT,
- Oinsá prepara Planu Sesaun bainhira sira atu halo treinamentu ka workshop,
- Oinsá sira servisu nu’udar ekipa, halo relatóriu bainhira ba vizita terrenu no téknika hakerek minutas.
- Identifika, analiza no resolve problema ka konflitu, inklui
- Prosesu implementasaun Enkontru akontabilidade ( Primeiru no Final)
Treinamentu ne’e utiliza métodu aprendizajen ba Adultu, alende ne’e partisipante sira halo mós simulasaun barak
Partisipantes sira halo simulasaun kona ba enkontru akontabilidade iha Suku
liu-liu ba kada tópiku atu nune’e sira bele pratika iha terrenu.
Entretantu, partisipante sira mós hala’o pratika kona ba enkontru akontabilidade primeiru no enkontru akontabilidade final bazeia ba prosedimentu matadalan nasionál ne’ebé estabelese ona iha PNDS.
Partisipante sira kontente tebes ho treinamentu ida ne’e, tanba bele aumenta sira nia koñesimentu iha area ne’ebé mak sira kontribui ba.
“Treinamentu ida ne’e, ajuda tebes ami fasilitadór sosiál sira, tanba ho treinamentu ida ne’e aumenta tan ami nia abilidade oinsá atu fasilita ita nia komunidade sira iha Suku no Aldeia”, Bernadete de Jesus Inacia, Fasilitador Sosiál Postu Administrativu Covalima.
Iha programa PNDS laos deit atu responde problema dezenvolvimentu iha Suku, maibé iha programa ida ne’e fó kapasitasaun mós ba komunidade sira oinsá sira bele organiza malu tu’ur hamutuk, hodi identifika rasik problema dezenvolvimentu saida mak sira enfrenta iha Suku, atu nune’e ho programa PNDS komunidade sira bele dezenvolve sira nia Suku di’ak liu tan ba iha futuru.
Treinamentu ne’e realiza tanba Servisu hamutuk entre Ekipa Treinamentu Sekretariadu – Tékniku PNDS, Ekipa Social Implementasaun Programa, no mós Sentru Treinamentu SDRA, ne’ebe hetan apoiu finanseiru husi Governu Australia.
-
- Simulasaun enkontru akontabilidae iha Suku
-
- Simulasaun apresentasaun gastus orsamentu ba komunidade
-
- simulasaun halo Apresentasaun relatorio ba komunidade
-
- Simulasaun kona ba komunidade sira hato’o duvidas iha enkontru akontabilidade SUku
