Sosializasaun PNDS Faze III La’o Ona

Sosializasaun programa PNDS ba Faze III hala’o iha 21 de Jullu no sei ramata iha inisiu de Agostu 2014. Ofisialmente suku 442 iha territóriu implementa ona PNDS. Ema esplika programa PNDS ba lideransa komanditária.

Tuir siklu PNDS iha etapa 1 to’o 12. Iha etapa primeiru sosializasaun sei hala’o iha nivel sub-distritu ho objetivu atu atualiza informasaun jerál kona-ba PNDS ba autoridade lokál, setór relevantes, lider Komunitaria no sosiedade sivíl sira atu nune’e sira bele iha koñesimentu báziku kona ba oin sá mak suku ida-idak hetan subsídiu suku annual no oin sá mak komunidade suku ezekuta orsamentu ida ne’e.

Antonio Gomes de Araujo, hanesan Xefe Suku Laktos, husi Sub-Distritu Fohorem, Distritu Covalima hato’o nia apresiasaun ba programa PNDS. “Ami agradese ba programa PNDS tanba bele tama iha ami nia suku ne’ebé izoladu, no husi programa ida ne’e ami bele deside hamutuk ho komunidade sá ida mak ami hakarak atu halo iha ami nia suku laran.” Nia hato’o mós katak hamutuk ho komunidade sira sei halo buat ne’ebé ho kualidade. “Ami sei responde ezijensia husi komunidade ho kualidade tanba iha implementasaun programa PNDS ami rasik implementa.”

Hanesan kompromisu husi governu katak antes fin de 2014 Suku hotu iha territóriu implementa ona PNDS. Implementasaun PNDS rasik hala’o fazeadamente. Faze I ne’ebe implementa iha Setembru 2013 iha suku 149, no daudaun ne’e prontu atu komesa konstrusaun (etapa 9). Faze II ne’ebé implementa iha Febreiru 2014 iha Suku 91, prepara ona planu detalladu ba projetu (etapa 7). No Faze III ne’ebé implementa iha fin de Jullu 2014 iha suku 202, halo sosializasaun iha sub-distritu (etapa 1). Depois sosializasaun iha sub-distritu, suku iha Faze III sei hala’o sosializasaun iha suku no aldeia hodi hili membru komunidade atu partisipa iha ekipa jestaun suku PNDS (etapa 2).

PNDS mak hanesan programa nasionál husi Governu Timor Leste atu hakbiit komunidade liuhusi fó oportunidade ba komunidade atu halo planu, dezeñu, implementa rasik infraestrutura báziku ho eskala ki’ik, jere orsamentu no halo manutensaun. Partisipasaun iha PNDS loke ba komunidade tomak inklui ema ho defisiénsia, ferik, katuas, feto, mane no juventude.


Lian / Language