Ekipa Tekniku Distrito halo apresentasaun materia PNDS ba partisipantes
Suku 149 ne’ebé implementa PNDS iha Faze I, agora ramata ona sosializasaun PNDS ba siklu 2 (15/11/2014). Siklu PNDS iha etapa 1 to’o 12, iha sosializasaun ida ne’e konsentra liu iha nivel sub-distritu, ho objetivu atu atualiza informasaun jerál kona-ba PNDS ba autoridade lokál, delegasaun territorial, lider komunitária no sosiedade sivíl sira atu nune’e sira bele iha informasaun báziku kona ba prosedimentu nomós lala’ok husi programa nasionál dezenvolvimentu suku ne’ebé governu estabelese ona iha territóriu.
Tubias Ornai, Administradór Sub-Distritu Fatuberliu-Distritu Manufahi iha ninia lia mak loke hatete katak : “Apresia tebes ba programa PNDS tanba bele responde ona ejijénsia balun mai husi komunidade”. Nia haktuir katak : “Xefe suku ho xefe aldeia tenke enkoraja komunidade atu partisipa iha programa PNDS ida ne’e, tanba ho partisipasaun mak bele fó susesu dezenvolvimentu komunitária iha Suku”.
Maluk feto ida ne’e hato’o duvidas ba apresentasaun ne’ebe hato’o husi ekipa tekniku PNDS
Reprezentante seitores saudi ne’ebé partisipa iha sosializasaun ne’e apresia tebes ba programa PNDS tanba rezultadu husi programa PNDS siklu primeiru bele responde no fasilita ona sira nia profesionais sira atu hala’o servisu iha komunidade nia let.
Rogerio da Conceição, reprezentante setór saudi husi sub-distritu Aileu Vila mensiona katak : “Sentru Komunitaria balun iha suku ami utiliza ona sai hanesan fatin SISKA (Servisu Integradu Saudi Komunitaria)”.
Iha intervensaun ne’e nia sujere katak fatin públiku hirak ne’ebé mak sai hanesan sentru atendementu ba públiku presiza tebes hetan apoiu husi programa atu harii hela fatin atu nune’e bele fasilita profesionais sira hodi servisu hakbesik liu ba komunidade.
Iha sosializasaun faze I ba siklu 2 lider komunitária sira hanesan xefe suku sira ne’ebé mak partisipa iha sosializasaun ne’e kontente ho programa PNDS tanba difikuldade dezenvolvimentu infraestrutura báziku ne’ebé komunidade enfrenta, ezemplu hanesan suku balun la asesu bee mós, estrada lokál la di’ak, fatin SISKA la iha, kondisaun eskola rural la favoravel maibé ho prezensa programa PNDS iha suku difikuldade hirak ne’e komunidade bele rezolve.
Suku hotu iha territóriu estabelese ona PNDS. Implementasaun PNDS rasik hala’o fazeada, Faze I atu kompleita ona siklu ba tinan ida (etapa 1 to’o 12) no agora tama ba iha siklu 2 hodi hahú prosesu etapa foun, Faze II maioria tama ona iha etapa 9 ba 10 no Faze III tama ona etapa 4 tuir siklu PNDS ne’ebé iha.
Programa PNDS sai ona hanesan programa nasionál Governu Timor Leste ninia ne’e foka liu ba iha dezenvolvimentu komunitária liu husi infraestrutura báziku ne’ebé komunidade sira deside. Xave importante atu fó susesu ba programa ida ne’e mak ema hotu nia partisipasaun tantu ferik-katuas, feto-mane, juventude inklui mós ita maluk sira ho defisiente, programa PNDS, hamutuk ita dezenvolve nasaun.
-
- Maluk feto ida ne’e hato’o duvidas ba apresentasaun ne’ebe hato’o husi ekipa tekniku
-
- Maluk ho defisiente sira partispa iha Sosializasaun PNDS iha Aileu
-
- Fasilitador tekniku PNDS halo apresentasaun kona ba PNDS iha Sosializasaun
-
- Fasilitador tekniku PNDS responde hela preokupasaun husi partisipantes
-
- Partisipantes sira intresante tebes akompanya apresentasaun PNDS husi ekipa tekniku
-
- Mana Kathy, representante husi Australian Aid halo introdusaun servisu bilateral GOTL ho DFAT
-
- Ekipa Tekniku Distrito halo apresentasaun materia PNDS ba partisipantes
