Iha loron 30 fulan Maiu 2016, Sekretariadu Tékniku Programa Nasionál Dezenvolvimentu Suku (ST-PNDS)
Direitora PNDS. Dulce Guterres Junior, Abertura Enkontru PNDS ho Linha Sektorais Iha Salaun Enkontru MPIE, Fatuhada
realiza enkontru Grupu Kordenasaun Tékniku Seitoral (GKTS), objetivu husi enkontru ne’e mak atu hametin liu tan kordenasaun servisu ho liña seitoral sira iha implementasaun programa PNDS.
Diretora PNDS, Dulce Guterres Junior, iha ninia intervensaun hatete katak, enkontru ida teknikamente importante tebes ba seitor hotu tanba bele hametin liu tan kordenasaun servisu entre liña seitores sira tantu iha nivel nasionál, munisípiu nomos iha nivel postu administrativu, tanba projetu hirak ne’ebé komunidade deside no implementa liu husi programa PNDS ne’e kobre ba seitor hotu, liu-liu seitor sira hanesan Saúde, Bee Mos ho Saneamentu, Edukasaun, Agrikultura, Obras Públiku (Dalan, Ponte no Kontrolu de Cheias).
Depois hetan intervensaun husi diretora PNDS, Chefe departamentu implementasaun programa, Marcio J. Marcal halo apresentasaun kona-ba progresu implementasaun programa PNDS ba iha partisipante sira atu nune’e sira bele apár no hatene kona-ba progresu husi implementasaun programa PNDS iha suku hotu iha Timor Leste.
Partisipante Husi Linha Sektorais Asiste hela Aprejentasaun Husi Sr. Marcio Nudar chefe Departemento Implementasaun PNDS
Hafoin remata apresentasaun, iha sesaun ba iha diskusaun, diskusaun ida ne’e espesifikamente atu hare liu ba kestaun tékniku ninia, liu-liu oinsá atu define hamutuk padraun konstrusaun ba iha implementasaun programa PNDS ne’ebé ita distribui ona ba iha seitores sira. Seitores agrikultura, Obras públiku, SAS verbalmente aseita ho padraun konstrusaun ne’ebé ita dezenvolve, tanba iha implementasaun programa PNDS, fokus liu ba iha infraestrutura báziku ne’ebé komunidade mak harii, no seitor hirak ne’e sira sujere kona-ba mistura simentu ho rai-henek tenke 1 : 4, atu nune’e bele garantia kualidade projetu, seitor Saúde ho Edukasaun seidauk fo komentáriu kona padraun konstrusaun ne’ebé haruka ba, tanba sira sei halo diskusaun hela.
Partisipante sira apresia tebes ho inisiativa ida ne’e, tanba bele hametin liu tan kordenasaun servisu entre seitor sira atu nune’e bele evita programa duplu akontese iha fatin hanesan.
Total partisipante ne’ebé partisipa iha enkontru ne’e hamutuk ema nain 15, mai husi seitor Saúde, Bee Mos ho Saneamentu, Edukasaun, Agrikultura no Obras Públiku.
