Programa Nasionál Dezenvolvimentu Suku (PNDS), nudar programa dezenvolvimentu komunitáriu, ne’ebe implementa ona iha suku territóriu Timor laran tomak, atu asegura implementasaun tuir prinsípiu PNDS, ekipa tékniku husi sekretariadu PNDS servisu hamutuk ho Sivitas Akadémiku UNTL Espesiál Fakuldade Siénsia Sosiais, Departamentu Dezenvolvimentu Komunitáriu hala’o seminar kona-ba progresu Implementasaun programa PNDS iha Timor Leste, iha Salaun Auditorium UNTL, Liseu-Dili (08/04/2016).
Sr. Eurico C. dos Reis Araujo. MA, nu’udar dekanu Fakuldade siénsia sosiais fo nia lia menon ba estudantes sira antes seminario ne’e hahu.
Sr. Eurico C. dos Reis Araujo. MA, nu’udar dekanu Fakuldade siénsia sosiais agradese tebes ba eventu ida ne’e tanba bele aumenta tan koñesimentu estudante ninia liu-liu kona ba polítika implementasaun programa PNDS ne’ebé ninia orientasaun ba iha dezenvolvimentu komunitáriu.
Chefe Unidade Operasional programa PNDS, Sr. Rosito Guterres, hatete katak: “Implementasaun Programa Nasionál Dezenvolvimentu Suku nudar programa komunitáriu tanba komunidade mak halo planu, define prioridades, no komunidade mak jere no planu ba projetu no ikus mai komunidade rasik mak sei hetan ninia benefísiu.”
Iha seminar ne’e iha oradór nain tolu, Doutóra Theresa Tam, Ph.D, koalia kona ba Partisipasaun Feto iha Implementasaun Programa PNDS, oradór rua seluk husi sekretariadu tékniku programa PNDS (Sr. Olderico Lopes ho Duarte dos Santos) koalia kona-ba : Lala’ok Implementasaun Programa PNDS ho Dezafiu no Vantajen Implementasaun Programa PNDS ba Komunidade.
Partisipantes sira antusias tebes rona apresentasaun husi orador sira
Doutóra Theresa Tam, Ph.D ne’ebé hanesan oradór iha seminar ne’e orgullu tebes ba programa PNDS tanba iha programa ne’e fó importánsia bo’ot tebes ba envolvimentu maluk feto sira, liu-liu iha parte kapasitasaun ba feto sira hodi nune’e sira bele envolve ativu liu tan iha prosesu dezenvolvimentu nasaun. Tanba ne’e nia rekomenda ba iha partisipante hotu liu-liu ba estudante husi departamentu dezenvolvimentu komunitáriu atu bele enkoraja komunidade nia partisipasaun liu-liu ba maluk feto sira hodi nune’e sira bele involve ativu iha prosesu dezenvolvimentu iha suku no aldeia.
Seminar ida ne’e la’o ho susesu, iha indikasaun katak hafoin apresentasaun husi oradór sira mosu perguntas, sujestaun nomos rekomendasaun husi partisipante sira, no estudante sira apresia tebes ba semináriu ida ne’e tanba bele aumenta tan sira nia koñesimentu kona-ba implementasaun programa PNDS.
Sr. Olderico Lopes, hanesan Chefe Departamentu M&A halo apresentasaun kona ba lalaok husi PNDS ba partisipantes sira
Estudante UNTL hanesan mós parte ida husi komunidade, intresante tebes atu hatene lala’ok no progresu implementasaun programa PNDS iha Suco iha territóriu tomak, ho referénsia ida ne’e estudante sira bele atrai liu tan komunidade nia partisipasaun atu nune’e bele haburas liu tan dezenvolvimentu iha nivel komunitáriu iha suku no aldeia liu husi implementasaun programa PNDS.
Semináriu ne’e hetan partisipasaun masimu husi Dekanu Fakuldade Siénsia Sosiais, Desente no Estudante Fakuldade Siénsia sosiál Departamentu Dezenvolvimentu Komunitaria UNTL.
-
- Sr. Januario (kamija mutin), hanesan Chefe Departamentu Dezenvolvimentu Komunitariu husi Fakuldade Siensia Sosiais UNTL, ne’ebe hanesan responsavel ba eventu ida ne’e.
-
- Partisipantes sira antusias tebes rona apresentasaun husi orador sira
-
- Sr. Rosito fo hela resposta kona ba preokupasaun hirak ne’ebe mai husi partisipantes
-
- Sr. Efren nu’udar estudantes UNTL, fo hela intervensaun kona ba apresentasaun ne’ebe hato’o husi orador kona ba PNDS
-
- Hafoin remata seminiar ekipa tekniku husi PNDS hetan apresiasaun liu husi intrega tais husi Doutora Theresa Tam.
-
- Orador sira prepara hela atu halo apresentasaun kona baprogressu implementasaun, dezafius nomos vantajen implementasaun PNDS ba komunidade
