Chefe Unidade Gestaun Operasional PNDS Nasional, Rosito Guterres hala’o abertura Formasaun ba Enjeñeiru sira.
Atu melhora diak liu tan servisu iha area tékniku iha suku no aldeia, Sekretariadu Tékniku Programa Nasional Dezenvolvimentu Suku (ST-PNDS), realiza formasaun ba enjeñeiru Nasional, enjeñeiru Munisipiu no FST kona-ba Light Steel Truus and Ceiling ou Jaringan iha Centro Nasional de Emprego e Formaçao Profisional (CNEFP), Tibar (03/072017).
Partisipante Sira rona hela intervensaun husi Chefe Unidade Gestaun Operasional PNDS.
Treinamentu ne’e nia objetivu atu aumenta koñesimentu Enjeñeiru sira nian, liu-liu iha area tékniku espesialidade kona-ba estrutura armadura uma kakuluk no forru, no iha abilidade báziku kona-ba oinsá uza material “Light Steel” nian atu nune’e bele fasilita komunidade sira hodi garantia kualidade projeitu infraestrutura bazika ne’ebe implementa direita husi komunidade.
Sr. Rosito Guterres, Chefe Unidade Operasional PNDS Nasional, iha ninia intervensaun hatete formasaun ne’e importante tebes ba enjeñeiru Nasional, Enjeneiru Munisipiu no FST sira.
“Formasaun ne’e hanesan parte ida atu dezenvolve no aumenta tan Enjeñeiru Nasional, Enjeneiru Munisipiu no FST sira nia abilidade liu-liu iha area tékniku espesífiku, atu nune’e bele fasilita komunidade sira iha suku ho diak liu tan”, Rosito Guterres, Chefe Unidade Operasional PNDS Nasional.
Treinamentu ida ne’e hala’o durante loron 10 ne’ebe hahú husi loron 03 fulan Julho 2017 ne’ebe fahe ba gropu 2 kada gropu ida fahe ba loron 5. Total partisipante sira ne’ebe partisipa iha formasaun iha gropu I ne’e hamutuk ema 20, ne’ebe enjeñeiru ne’e mai husi munisípiu 12 ho Regiáo Administrativa Especial Oé-cusse Ambeno (RAEOA), FST no Asessesor Nasional sira.
