Chefe Departemento Recursus Humanus, Gina Braz halo abertura ba Enkontru Kordenasaun Fulan Novembru iha Hotel Ramelau, Dili
Atu kondena di’ak liután servisu iha baze kona-ba implementasaun programa PNDS, Sekretariadu Tékniku Programa Nasionál Dezenvolvimentu Suku (ST-PNDS) organiza enkontru kordenasaun iha nivel nasionál, enkontru kordenasaun ba fulan Novembru ne’e hala’o iha hotel Ramelau, Dili 07/11/2016.
Enkontru kordenasaun ne’e rasik ofisiálmente abertura husi Chefe Departementu Recursus Humanus (PNDS) Gina Braz ne’ebé reprezentante Direitora (PNDS), Hanesan bai-bain enkontru kordenasaun ne’e realiza atu melhora kordenasaun servisu funsionáriu sira ba implementasaun Programa Nasionál Dezenvolvimentu Suku iha baze.
Chefe Departementu Recursus Humanus hatete iha ninia intervensaun apela ba funsionáriu PNDS tomak tantu iha nasionál nomós sub-nasionál hotu-hotu atu haka’as an no mantein nafatin dixiplina, atu nune’e bele melhora liu tan servisu programa PNDS iha suku iha territóriu.
Funsionario PNDS Nasional ho munisipiu inklui ekipa Apoiu ba programa PNDS partisipa iha enkontru kordenasaun nasional
Enkontru ida ne’e hanesan atividade regular ne’ebé akontese iha kada fulan, hanesan bain-bain, iha enkontru ne’e kada munisípiu inklui mós departamentu ida-idak aprezenta rezultadu progresu servisu nomós dezafiu ne’ebé ekipa hasoru iha terrenu atu nune’e bele buka solusaun hamutuk, alende aprezenta rezultadu servisu nomós dezafiu, ekipa ida-idak aprezenta mós planu servisu ne’ebé atu hala’o iha fulan tuir mai.
Partisipante husi enkontru ne’e Kordenadór PNDS husi Munisípiu, Xefe Unidade, Xefe Departamentu, funsionáriu PNDS, nomós Assessor Internasional no nasionál, Ekipa Suporta Terrenu (Field Support Team (FST)) husi Ajensia Cardno ne’ebe durante ne’e fó apoiu ba implementasaun Programa PNDS.
