Workshop Jender, iha Joao Paulo II
Workshop ne’e hala’o ho objetivu atu fahe istória susesu no lisaun pozitivu husi komunidade liu-liu maluk feto sira nia partisipasaun iha prosesu dezenvolvimentu komunidade iha PNDS. Workshop ida ne’e hala’o iha Salaun João Paulo II, Comosro-Dili (06/12/2016).
Iha workshop loron ida ne’e maluk feto sira fahe esperensia lubuk ida kona-ba susesu involvementu feto sira nia iha dezenvolvimentu komunitáriu iha implementasaun programa PNDS iha sira Suku.
Maria Manuela Castro, hanesan membru Ekipa Jestaun Suku (EJS) husi Suku Duyung, PA Metinaro
“Hau luta maka’as ba proposta bee mos iha hau nia Suku laos ba hau nia an, maibé komunidade sempre halerik ba bee mos, tanba sira asesu ba bee mos iha fatin ne’ebé dok.” Hato’o husi Maria Manuela Castro, hanesan membru Ekipa Jestaun Suku (EJS). “Maibé agora di’ak ona tanba bee mos besik ona iha komunidade nia let,” nia haktuir.
Iha parte seluk, maluk feto balu apresia tebes ba implementasaun programa PNDS, tanba iha programa ida ne’e la’os deit atu responde ba iha infraestrutura bázika iha Suku, maibé kapasita mos sira atu bele sai hanesan lider iha sira nia Suku.
Elmalda da Costa, antes ne’e hanesan komunidade bai-bain iha uma deit, nia hanesan ema ne’ebé nonok, moe no kbiit laiha atu koalia iha ema barak nia oin, hafoin programa PNDS tama iha ninia Suku Biqueli, nia eleitu hanesan prezidente KPA no iha altura ne’e nia lakohi atu assume kargu ida ne’e iha ninia Suku, maibé ho apoiu ne’ebé nia hetan husi programa PNDS nomos ninia parente sira, nia konsege sai hanesan feto potensiál iha ninia Suku.
Elmalda da Costa, Presidente KPA, Suku Biqueli, Postu Administrativu Atauro
“Uluk hau labele agora hau bele, uluk hau la hatene agora hatene, uluk hau moe agora lae, uluk hau tauk agora brani, mehi ne’ebé hakarak sai lider ohin loron bele hamarik iha oin”, haktuir Elmalda da Costa, Presidente KPA, Suku Biqueli, Postu Administrativu Atauro.
Prezidente Autoridade Munisipál Dili, Gaspar Soares, ne’ebé partisipa iha workshop ne’e sente orgullu ho Programa PNDS, tanba fo espasu boot ba partisipasaun feto iha prosesu tomak, atu nune’e bele garantia igualdade jéneru iha prosesu dezenvolvimentu iha rai laran.
Dezenvolvimentu nasaun ida ne’e atu ba oin la’os deit responsabilidade ema ida deit, maibé responsabilidade ita hotu-hotu nia. Iha programa PNDS hanesan programa komunitáriu ida ne’ebe fo oportunidade ba ema hotu atu kontribui iha prosesu dezenvolvimentu ba nasaun nian.
Total Partisipante hamutuk ema 130, kompostu husi Ekipa Jestaun Suku, chefe Suku, Administradór/reprezentante Postu Administrativu 6, NGOs, Media no inklui funsionáriu PNDS Nasionál, Munisípiu no Postu Administrativu.
