Reprezentante Administrador Munisípiu Lautem, Oscar Dias Quintas, Hala’o Avertura ba Atividade Seminariu konaba kontribuisaun Programa Nasionál Dezenvolvimentu Suku Hodi Hasa’e Rendimentu Ekonomia Feto iha Munisipiu Lautem.
Atu selebra Loron lnternasional Feto Rural, ne’ebé monu iha dia 15 Outubru, Sekretariadu Tékniku PNDS Hala’o Semináriu kona-ba kotribuisaun Programa Nasionál Dezenvolvimentu Suku Hodi Hasa’e Rendimentu Ekonomia Feto iha munisípiu Lautem ne’ebé hala’o iha salaun enkontru Munisípiu Lautem, 03/10/2019.
Semináriu ne’e hala’o ho objetivu atu fahe esperensia ba malu husi istória ne’ebé diak, susesu no fo oportunidade ba feto maluk sira atu aprende kona ba oinsá PNDS fó tulun ba feto sira hodi hasa’e sira nia vida ekonomia lor-loron no iha tempu hanesan partisipante (grupu feto sira) mós sei lori sira nia produtu ne’ebé durante ne’e produs liu husi kontribuisaun PNDS nian.
Diretora PNDS Nasional , Dulce Guterres Junior Hala’o Intervensaun iha Seminariu konaba kontribuisaun Programa Nasionál Dezenvolvimentu Suku Hodi Hasa’e Rendimentu Ekonomia Feto.
Dulce Guterres Junior, nu’udar Diretora Nasional Programa PNDS ne’ebé partisipa iha Semináriu ne’e hatete katak atu feto sira labele tauk partisipa no kontinua forte tamba atu Dezenvolve nasaun presija mos feto nia kontribuisaun nomos ba maluk feto sira bele fahe esperensia no informasaun husi istoria diak para bele motiva maluk feto sira seluk atu hasa’e sira nia kapasidade no enkorajen feto maluk sira hodi kontinua involve an nafatin liu husi partisipasaun barak liu tan iha prosesu tomak hodi bele hadi’a diak liu tan implementasaun programa PNDS iha nivel aldeia no suku.
Iha parte seluk Reprezentante Administrador Munisípiu Lautem, Oscar Dias Quintas, hatete katak Semináriu konaba kontribuisaun Programa Nasionál Dezenvolvimentu Suku Hodi Hasa’e Rendimentu Ekonomia Feto ne’e importante tebes tamba bele sai hanesan refrensia ba inan feto sira iha munisípiu lautem liu husi materia ne’ebé oradór sira fahe no sai hanesan bukae ida hodi fahe esperensia no informasaun ba malu liu husi programa PNDS.
Expozisaun Produtu Lokal Ne’ebe Aprezenta Husi Inan Feto Sira iha Munisipiu Lautem.
Iha semináriu ne’e mos aprezentasaun husi Ekipa PNDS Nasional konaba kontribuisaun Programa Nasionál Dezenvolvimentu Suku Hodi Hasa’e Rendimentu Ekonomia Feto iha munisípiu Lautem, nomos Reprezentante husi SEM, kona-ba esperensia SEM iha Dezenvolvimento Socio-Ekonomia maluk feto Timor.
Semináriu ida ne’e hala’o mos Mini Expo ne’ebé hetan antusiasmu tebes husi partisipante sira tanba iha prosesu aprezentasaun nia laran hetan ideia barak husi maluk feto sira hodi fahe esperensia lubuk ida kona-ba susesu involvementu feto sira iha Dezenvolvmento komunitariu iha implementasaun programa PNDS iha sira nia suku.
Partisipasaun husi semináriu loron ida ne’e partisipantes mai husi Reprezentante Vice Ministru Administrasaun Estatal, Reprezentante Husi Administrador Munisípiu Lautem, Diretora Nasional PNDS, Pontu Vocal husi MAE, Reprezentante husi Linhas Ministerial munisípiu Lautem, Diretor Delegasaun Munisípiu Lautem, Reprezentante husi SEM, husi ekipa jestaun suku (EJS), Chefe Suku, Chefe Aldeia, Reprezentante SEM, funsionáriu PNDS Nasionál, Munisípiu no Postu Administrativu, inklui mós Ekipa Suporta Terrenu (Field Support Team (FST)) husi Ajénsia Cardno.
