Ekipa Husi PNDS no Komando PNDS halao enkontru ho Ekipa Embaisada Japaun konaba Implementasaun uma OPS.
Konstrusaun uma ba polísia komunitariu sanulu resin hat ne’ebé konstrui ho orsamentu doadores ne’ebé hetan apoiu husi Governu Japaun liu husi embaixada Japaun iha Timor Leste ne’e tama ona ba iha etapa diskusaun dezeñu no kostu ba implementasaun Obra.
Komandante Polisia komunitariu halao aprezentasaun konaba implementasaun uma OPS.
Iha enkontru konsultasaun ne’ebé Sekretariadu Tékniku PNDS halo hamutuk Komando Geral PNTL no Governu Japaun liu husi Reprezentante Embaxada Japaun iha Timor Leste ne’e hala’o iha salaun enkontru Komando Geral PNTL, enkontru kontinua diskuti kle’an liu tan kona-ba dezeñu no kustu tanba governu Japaun ne’ebé apoiu orsamentu ne’e hakarak konstrusaun uma ba polísia komunitariu ne’e uza Sistema PNDS.
Tuir komandante Operasaun PNTL, Henrique Da Costa, katak doador sira hakarak uza mekanizmu PNDS hodi implementa umasanulu resin hat ba polísia komunitariu ne’e tanba tuir avaliasaun ne’ebé doador sira halo katak mekanizmu ne’ebé PNDS uza di’ak no kapás, tanba ne’e mak sira propoint atu planu uma 3 ba iha munisípiu Aileu ne’ebé uza Sistema PNDS hodi konstrui Uma ba Polísia komunitariu.
Entretantu reprezentante husi PNDS Nasional, Chefe Unidade Operasional Programa PNDS, Sr. Rosito Guterres, hatete diskusaun ho ekipa husi PNTL no reprezentante husi Embaxada Japaun kona-ba sistema PNDS ne’ebé sei uza hodi implementa konstrusaun uma ba polísia komunitariu, atu hare ba lala’ok implementasaun nian.
Tuir Chefe Unidade Operasional, doador propoint uza sistema PNDS tanba ho mekanizmu PNDS implementasaun obra ho medida ki’ik nune’e sei konstrui ho orsamentu ne’ebé ki’ik, tanba aprovasaun implementasaun ne’e mak dezenvolvimentu komunitaria no husi komunidade sira iha suku laran e sira mos fo kontribuisaun. Data fiksu ba implementasaun ba uma polísia komunitariu seidauk determina iha enkontru ne’e no sei halo fila enkontru tuir mai hodi determina los-los implementasaun ba uma polísia komunitariu.
Partisipa iha enkontru ne’e Komandante Operasional PNTL, Komandante Polísia Munisipiu Aileu, Komanadante Polísia Komunitariu, Reprezentante husi Embaxada Japaun no Nova Zelandia , Reprezentante husi PNDS Nasional no parseirus husi Agency Cardno.
