Fungsionariu ST- PNDS hamutuk ho Ekipa Suporta no Asesor Husi Cardno Halo Diskusaun konaba Sistema Jestaun Keixa
Programa Nasional Dezenvolvimentu Suku (PNDS), nudar programa ne’ebé ho nian prinsipiu katak komunidade mak sai nain ba dezenvolvimentu, atu asegura prinsipiu programa nian, Ekipa tékniku sekretariadu suporta husi staff suporta no asesór sira hala’o diskusaun kona-ba dezenvolvimentu mata dalan no sistema jestaun keixa, diskusaun nee hala’o iha loron (15/07/ 2015) iha salaun enkontru CARDNO Balide, Dili.
Estabelesimentu Sistema Jestaun Keixa importante atu harii fiar no haforsa governasaun. Efetividade husi sistema ne’e depende ba autór diferente PNDS sira-nia komprensaun diak ba direitu no responsabilidade husi partes intersadu hotu, no komprensaun ida ne’ebé klaru ba prosesu no sistema PNDS nian. Objektivo husi sistema no mata dalan ba keixa nian mak: Harii kapasidade atu kompriende no halo tuir prinsipius governasaun diak, Hamenus hahalok la diak, Hamenus lakon finanseiru/benefisiu, Asegura justisa liu husi sansaun no asaun legál ba kriminozu sira, Kria fiar no Klarifika perguntas/konfuzaun kona ba prosedimentu PNDS nian.
Ekipa Suporta no Asesor Husi Cardno aprejenta ideia konaba etapa Reklamasaun keixa husi Komunidade
Iha diskusaun identifika katak keixa ka reklamasaun bele hato’o liu husi telefone, SMS, Karta, Email, Media (Jornal, Radio no Televizaun) media sosial (Facebook) no seluk tan, husi nee mak foin bele identifika preokupasaun ne’ebé hato’o konsidera hanesan problema ka lae. Iha rezultadu husi diskusaun téknika nee mak deside ona klasifikasaun, sistema reklamasaun ho nian kategoria reklamasaun ba iha pontus hat, mak hanesan problema ne’ebé ligado ho pesoál, problema kona-ba osan, problema desijaun, no problema kontruksaun.
Tuir planu ekipa tékniku trasa ona planu asaun ba dezenvolvimentu sistema keixa nian no sei halo treinamentu no sosializasaun ba sistema atendementu reklamasaun refere.
