Diretora PNDS, Dulce Guterres Junior, Encera treinamentu ba ema ho defisiensia neebe eleitu nudar EJS
Treinamentu diskursu iha públiku ba ema ho defisinsia ne’ebé sai hanesan ekipa jestaun suku (EJS) hodi halo jestaun implementasaun Programa Nasional Desenvolvimentu Suku iha nivel Suku realiza iha Hotel Ramelau, Aimutin Dili (30-31/01/2018).
Treinamentu ne’e hala’o ho objetivu prinsipál atu bele hasa’e abilidade no konfiansa an ba partisipante sira atu bele involve no karik posivel lidera enkontru PNDS nia iha nivel Suku, nune’e bele partisipa ativu iha prosesu planeamentu no implementasaun PNDS. Iha treinamentu, partisipante sira simu materia aprendizajen konaba abilidade atu ko’alia iha oin ka ko’alia iha públiku, nune’e rona mos esperensia husi maluk ho defisiensia seluk nudar jestu atu inspira partisipante sira hodi fiar an ko’alia iha publiku.
Iha Sesaun ikus husi treinamentu ne’e partisipante sira aprende oinsá halo diskursu iha públiku. Hafoin pratika diskursu iha públiku ka ko’alia iha públiku partisipante sira iha mos oportunidade hodi halo diskusaun aberta ho estrutura PNDS ne’ebé lidera husi Directora Nasional Sekretariado Tekniku PNDS, Dulce Guterres Junior. iha diskusaun ne’e partisipante sira husu atu kontinua implementa programa PNDS hodi bele responde komunidade nia difikuldade hanesan kondisaun estrada rural ne’ebé barak sei a’at, falta bee mos inklui difikuldades seluk ne’ebé liga ho sira nia moris.
Treinadora husi Asosiasaun Ema ho Defisiensia hato’o hela materia ba partisipante sira hanesan EJS neebe akompanha husi Diretor Delegasaun PNDS
Hatan ba preokupasaun hirak ne’e, Directora Nasional Sekretariado Tekniku PNDS, Dulce Guterres Junior hateten dala barak akompanha vijita Ministru da Administrasaun Estatal iha baze, Ministru sempre apresia implementasaun programa PNDS, tanba bele responde imidiata kondisaun balun ne’ebé komunidade enfrenta, nune’e espera katak governo sei kontinua implementa programa ne’e.
Iha sorin seluk lider masimu PNDS ne’e hateten Sekretariado Tekniku PNDS propoin ona orsamentu PNDS nian ba tinan ne’e, inklui orsamentu ba manutensaun obra hirak ne’ebé komunidade sira mak halo liu husi implementasaun PNDS, orsamentu ba manutensaun nee Ministru mak orienta atu propoin mos iha orsamentu PNDS nian.
Hafoin remata diskusaun aberta entre EJS ho estrutura PNDS, iha sesaun enceramentu aktividade treinamentu nee, Directora Dulce Guterres hato’o parabens ba partisipante sira tanba bele aproveita didiak oportunidade ne’ebé iha, hodi aumenta fiar an wainhira ko’alia iha públiku. Nune’e espera ba futuru PNDS sei bele iha kooperasaun diak liu tan, ho Asosiasaun Defisiensia Timor Leste hodi nafatin fo treinamentu kapasitasaun ba maluk sira ho kondisaun defisiensia.
