Reprezentante Administrador Postu Hato-builico, Nuno Alves de Araujo, Apresia ho Programa PNDS, Tanba Programa PNDS Rejolve Dadaun Difikuldades Balun Ne’ebé Komunidade Sira Enfrenta.
Atu hametin liu tan linha kordenasaun entre fungsiunariu PNDS, Sekretariado Tékniku Programa Nasional Dezenvolvimentu Suku (PNDS) iha fulan Setembru 2019 realiza enkontru kordenasaun iha Postu Administrativo Hato-builico, Munisípiu Ainaro, aktividade ne’e realiza iha Salaun Centro Gropu Trabalho Turismo Hato-builico, 12/09/2019.
Objetivo husi enkontru koordenasaun ne’e mak atu bele kordena diak liu tan servisu hotu ne’ebé ligado ho implementasaun rutina programa PNDS nian liu-liu foka ba implementasaun Faze III Siklus 2 ne’ebé sei implementa iha suku 202 iha territóriu Timor Leste.
Reprezentante Diretora Nasional ST-PNDS, Secondino Freitas Moreira Hala’o Abertura Enkontru Koordenasaun Fulan Setembru 2019 iha Salaun Centro Gropu Trabalho Turismo Hato-builico.
Alende diskute kona-ba plano global PNDS nian iha enkontru ne’e mos diskute kona-ba plano global atividade adisional seluk ne’ebé halo ona akordu atu implementa eskola sia inklui fatin halimar hamutuk 67 ne’ebé sei implementa iha suku hirak ne’ebé pertense iha implementasaun.
Iha intervensaun reprezentante Diretora Sekretariado Tékniku PNDS, Secondino Freitas Moreira, apela ba funsionáriu PNDS Nivel Nasional to’o iha Munisipiu atu haka’as an no mantein nafatin dixiplina hodi nune’e bele melhora liu tan servisu iha implementasaun Programa PNDS iha baze, liu-liu implementasaun Faze III Siklus 2, no aktividade adisional husi Ministeriu Edukasaun kona-ba fatin halimar 67 no Kontrusaun no rehabilitasaun Eskola edukativu sia husi Ministeriu Educasaun .
Direktur Delegasaun PNDS Munisipiu Aprezenta Progresu Implementasaun PNDS iha Kada Munisipiu.
Entretantu reprezentante Administrador Postu Hato-builico, Nuno Alves de Araujo ne’ebé partisipa iha Sesaun abertura ba enkontru kordenasaun PNDS, apresia ho implementasaun programa PNDS, tanba implementasaun programa PNDS rejolve dadaun difikuldades balun ne’ebé komunidade sira enfrenta.
Iha enkontru ne’e mos Diretor Delegasaun PNDS Munisípiu aprezenta kona-ba plano aktividades kada Munisipiu nia hodi bele ajusta tuir plano global Nasional, enkuantu husi nivel Sekretariado, chefe Unidades no Departementus aprezenta rezultadu progresu servisu iha Nivel Nasional iha kestaun tranferensia fundus operasional no infraestrutura, kestaun lojistika, sistema MIS husi M&E, rekursu Humano kona-ba forsa trabalho nomo’s Komunikasaun aprezenta kona-ba oinsá públiku asesu ba website.
Enkontru koordenasaun ne’e partisipa husi Koordenador PNDS husi Munisípiu 12 no RAOEA, Chefe Unidade, Chefe Departementu, Funsionáriu PNDS Nasional, Assessor Nasional no Internasional nomo’s ekipa Suporta Terrenu (Field Ajensia Team (FST)) husi ajénsia Cardno ne’ebé durante ne’e fo apoiu ba implementasaun Programa PNDS.
