Administrador Munisipiu Viqueque, Grigorio Henriques abertura enkontru avaliasaun Annual iha salaun Administrasaun Munisipal Viqueque.
Avaliasaun Annual ba implementasaun programa PNDS iha Munisipiu Viqueque siklu dahuluk hala’o iha Salaun enkontru Administrasaun Munisipal Viqueque, 24/04/2017. Avaliasaun nee hala’o ho objektivo atu hare hikas susesu no dezafiu implementasaun Programa PNDS ne’ebé implementa iha Munisipiu Viqueque.
Administrador Munisipiu Viqueque, Grigorio Henriques iha abertura avaliasaun nee hateten implementasaun programa PNDS iha Munisipiu Viqueque lao ho diak no susesu tanba tuir observasaun Administrador Munisipiu durante implementasaun ate data avaliasaun nee realiza, seidauk iha keixa ruma mai administrasaun Munisipal ne’ebé liga ho kestaun implementasaun.
Diretor Delegasaun PNDS Munisipiu Viqueque, Estevao de Carvalho hateten alende hala’o avaliasaun fahe mos informasaun kona-ba lei no mata dalan ba implementasaun programa PNDS tanba iha Munisipiu Viqueque ba tinan nee besik porsentu 50% chefe suku foun ne’ebé foin assume kargu nudar chefe suku, nune’e inportante mos atu fahe informasaun kona-ba mata dalan no baze ba implementasaun programa PNDS atu chefe suku foun sira bele apar didi’ak ho implementasaun programa PNDS.
Aktividade avaliasaun iha Munisipiu Viqueque ensera ho serimónia entrega premiu apresiasaun ba Suku manan nain mak hanesan suku Nahareka husi postu Ossu nudar manan nain primeiru lugar, segundu lugar ukupa husi suku Uaimori husi postu Viqueque no suku Uaniuma husi Postu Watucarbau nudar suku manan nain terseiru lugar.
Chefe Suku no EJS inklui reprejentante linha sektoral partisipa iha enkontru Avaliasaun Annual PNDS Munisipiu Viqueque.
Alende avaliasaun aktividade seluk ne’ebé hamutuk ho media sira observa mak rejultado implemetasaun infraestrutura basiku ne’ebé komunidade sira mak konstrui liu husi implementasaun programa PNDS.
Iha orsevasaun nota katak projetu infraestrutura basiku lubuk ida ne’ebé konstrui husi komunidade ho orsamentu PNDS, benefisia ona komunidade sira, hanesan iha suku caraubalun iha postu Viqueque Vila, kanalizasaun bee mos iha suku refere benefisia ona komunidade sira.
Agusto da Costa hanesan benefisiáriu espresa sira nia sentimentu kontente tanba ho implementasaun programa PNDS hodi kanaliza bee mos to’o iha sira nia suku, sira bele asesu ona ba bee mos besik iha sira nia uma oin, no la gasta tempu ho distansia ne’ebé dok hodi hetan bee mos. Tuir agusto da Costa implementasaun programa PNDS ajuda tebes komunidade sira iha area rural hodi responde dadaun ona perkupasaun no difikuldades ne’ebé komunidade sira halerik iha baze.
-
- Journalista RTTL dada lia hela ho Komunidade neebe sai hanesan benefisiariu
-
- Agusto da Costa hanesan benefisiariu ba instalasaun bee mos iha Suku Caraubalun fase hela liman ho bee mos neebe kontrui ho orsamentu PNDS
