Enkontru Kordenasaun Fulan Maio ne’eba Hala’o Iha Etda, Dili
Sekretariadu tékniku PNDS hala’o sorumutu kordenasaun nasionál iha Etda, Dili (27/05/2016). Objetivu husi enkontru ida ne’e atu kria kordenasaun entre nivel nasionál ho munisipiu, aktualiza progresu programa PNDS no mós troka ideia kona ba dezafiu ne’ebé akontese iha implementasaun PNDS iha terrenu.
Enkontru ida ne’e hanesan atividade regular ne’ebé akontese iha kada fulan, hanesan bain-bain, iha enkontru ne’e kada munisípiu inklui mós departamentu ida-idak aprezenta rezultadu progresu servisu nomós dezafiu ne’ebé ekipa hasoru iha terrenu atu nune’e bele buka solusaun hamutuk, alende aprezenta rezultadu servisu nomós dezafiu, ekipa ida-idak aprezenta mós planu servisu ne’ebé atu hala’o iha fulan tuir mai.
Dulce Guterres Junior, hanesan mós Diretora Nasional PNDS iha nia intervensaun nia optimista ho servisu ekipa ne’ebé agora iha. Nia hatete katak: “Maski dezafiu barak ne’ebé ita hasoru iha implementasaun Programa PNDS ba fase hotu-hotu maibé ho Ekipa ne’ebé forte ita sei bele resolve dezafiu hirak ne’e ho di’ak “.
Diretur Delegasaun PNDS Munisipiu Aileu Aprejenta Progresu Implementasaun Programa PNDS Husi Munisipiu Aileu
Iha enkontru ne’e mos aprejentasaun husi ekipa Teknikal Audit kona-ba konstrusaun PNDS nian nebe’e sira halo iha Munisipiu Lima maka hanesan Aileu, Ermera, Liquisa,Viqueque nomos Covalima ne’ebé sira halo ba dala rua ne’eb’e premeiru sira halo iha Munisipiu Ermera, Bobonaro, Liquisa, Manatuto, Baucau no Aileu.
Partisipante husi enkontru ne’e Kordenadór PNDS husi Munisípiu, Xefe Unidade, Xefe Departamentu, funsionáriu PNDS, nomós Assessor Internasional no nasionál, Ekipa Suporta Terrenu (Field Support Team (FST)) husi Ajensia Cardno ne’ebe durante ne’e fó apoiu ba implementasaun Programa PNDS.
