Autoridade lokal no EJS husi Munisipiu Ainaro no Manufahi partisipa iha atividade Suku vijita malu iha Munisipiu Covalima, Suai.
Programa suku vizita malu ba dala tolu iha tinan 2016 konsentra iha Munusípiu Covalima (16-18/05/2016), partisipante iha programa ne’e mai husi munisípiu Ainaro ho Munisípiu Manufahi. Programa Ida ne’e nia objetivu atu fahe esperiensia ba malu kona-ba susesu no dezafiu ne’ebé komunidade sira hetan iha implementasaun programa PNDS iha Munisípiu ida-idak.
Molok ba terrenu, ekipa ida ne’e ba dahuluk hasoru malu ho autoridade munisípiu
sira iha Administrasaun Munisípiu Covalima, ne’ebé reprezenta administradór Munisípiu Covalima, simu ekipa ne’e kontente tebes tamba hetan vizita husi autoridade lokál nomos lider komunitáriu mai husi Munisípiu seluk (Ainaro no Manufahi).
Suku ne’ebé sai tarjetu ba vizita ne’e mak suku Labarai, tamba iha implementasaun programa PNDS, komunidade iha suku ida ne’e hatudu duni sira nia partisipasaun aás tebes. Iha fahe esperensia ba malu, lider komunitária husi suku Labarai, Agapito do Rego Moniz, hatete katak: “Xave importante atu fo susesu ba programa sira iha suku mak komunikasaun entre lider komunitáriu komunidade tamba ho komunikasaun ne’ebé di’ak, bele enkoraja komunidade nia partisipasaun iha programa hotu ne’ebé tama mai iha suku.”
Suku Labarai, implementa programa PNDS iha faze II, projetu ne’ebé komunidade harií liu husi programa PNDS hamutuk hat, tolu beé mos no ida seluk beé dalan ou valeta, projetu hirak ne’e oras ne’e dau-daun komunidade sira utiliza hela.
Intervensaun husi Autoridade Lokal Munisipiu Covalima iha atividade Suku vijita malu neebe halao iha suku Labarai, Suai
Hafoin remata vizita programa PNDS iha suku, iha oportunidade atu halo enkontru ikus ho autoridade lokál iha munisipiu Covalima, hodi halo avaliasaun ba aktividade ne’ebé remata ona. Sr. Jose Pina Cardoso, nudar Administradór Munisipiu Covalima, “sente kontente ho programa ne’e tamba liu husi programa suku vizita malu, autoridade Munisípiu ho lider komunitáriu nomos ekipa jestaun suku sira bele fahe ba malu kona-ba esperiensia no kordenasaun servisu hamutuk ne’ebe akontese iha munisípiu ida-idak, liu-liu iha implementasaun programa PNDS iha suku.”
Programa PNDS hanesan programa komunitáriu, iha implementasaun programa ne’e komunidade mak sai hanesan autór hodi jere dezenvolvimentu iha suku. Programa suku vizita malu hanesan oportunidade di’ak ba autoridade munisípiu, lider komunitáriu nomos ekipa jestaun suku sira atu troka hanoin ba malu hodi nune’e bele fo suksesu ba programa hotu ne’ebé tama iha suku, tamba suku mak sai hanesan alvu ba dezenvolvimentu.
