Reprezentante Vice Ministro MAE, Diretor Geral Dezentralizasaun Administrativa Akompanha husi Diretora Nasional PNDS Ofisialmente Inagura Moru Haleu Escola Filial Bibileo.
Projetu Moru Haleu Escola Filial Bibileo ne’ebé konstrui iha Suku Bibileo, Munisípiu Viqueque ho Orsamento Governu ne’ebé aloka liu husi implementasaun Programa Nasional Dezenvolvimentu Suku, (PNDS) ofisialmente Inaugura Husi Reprezentante Vice Ministro MAE Akompanha husi Diretora Nasional PNDS no Ekipa, (17/01/2020). Konstrusaun Moru Haleu Escola Filial iha Suku Bibileo hanesan preokupasaun husi inan aman sira atu nune’e estudante sira bele hakmatek iha ambiente Escola ne’ebé seguru.
Antonio Gregorio nudar Reprezentante Administrador Munisípiu Viqueque, Hato’o Agradese ba PNDS iha Inaugurasaun Moru Haleu Escola Filial Bibileo.
Reprezentante Vice Ministru MAE, Diretor Geral Desentralizasaun Administrativa Amandio Paulino de Sousa hafoin inaugura obra ne’e ba komunidade hateten Programa Nasional Dezenvolvimentu Suku fo lisaun lubuk ida ba komunidade atu iha kapasidade bele organiza hodi hakbi’it komunidade liu husi sira nia partisipasaun iha prosesu dezenvolvimentu iha nivel Suku, lisaun seluk husi PNDS mak bele hasa’e rendimentu familiar.
Antonio Gregorio nudar Reprezentante Administrador Munisípiu Viqueque, agradese tebes ba PNDS liu husi Diretora PNDS no ekipa PNDS iha Munisípiu Viqueque ne’ebé tau atensaun bot tebes ba konstrusaun Moru Haleu Escola iha suku Bibileo. Antonio Gregorio hateten konstrusaun Moru Haleu Escola ne’e halo tanba aspirasaun husi komunidade Suku Bibileo hodi foti pririodade ne’e sai nudar prioridade suku nian iha implementasaun PNDS atu bele proteze estudante sira iha ambiente ne’ebe seguru.
Moru Haleu Escola Filial Bibileo iha Suku Bibileo, Munisipiu Viqueque ne’ebe Inagura Husi Reprezentante Vice Ministro MAE.
Nune’e mos Chefe suku Bibileo, Odete Maria Dos Anjos, hato’o agradesimentu tanba bele responde ona komunidade iha suku ne’e nia hakarak, tuir autoridade suku ne’e katak konstrusaun moru ba eskola ne’e ami ejiji kleur ona ba ministériu kompetenti tau iha prioridade maibe ho PNDS bele ona responde dadauk ami nia ejijensia, nune’e ami agradese tebes ba PNDS.
Konstrusaun ba Moru Escola Filial Bibileo ho Montante Total osan $42,661.45 ho orsamentu ne’e halo ona konstrusaun Moru Haleu Escola Filial Bibileo maibe depois implementa osan restu sira ne’e halo mos Konstrusan ba Sala Merenda Escolar, Armajen Escola no Hadia Sistema Bomba Be’e, ho nune suku bibileo gastu osan hamutuk $41,791.12 ho balansu $670.33 ne’ebé mak iha kontabankaria suku.
Hola parte husi Serimónia inaugurasaun ne’e mak Reprezentante Vice Ministru MAE, Chefe Gabinete MAE, Reprezentante husi Administrador Munisipiu Viqueque, Diretora Nasional PNDS, Diretora Nasional Ensino Superior ME, Komandante Polisia Munisipiu Viqueque, Diretór Delegasaun Munisípiu Viqueque, Reprezentante husi HANSD, Reprezentante husi Embaxada Australia, Autoridade Lokal sira, ekipa jestaun suku, Funsionariu PNDS Nasional no Munisípiu Viqueque, Ekipa Husi PARTISIPA (Cardno), Profesora no Profesor Escola Filial Bibileo no Komunidade Suku Bibileo.
