Rejultado Monitorizasaun konjunta iha Munisipiu Manufahi no Ainaro Hatudu Progresu Ne’ebe Diak

Diretora PNDS, Dulce Guterres Junior esplika hela objektivo monitorizasaun konjunta konaba ezekusaun orsamento implementasaun faze 3 siklu 2 iha Suku Maulau, Postu Maubisse, Munisipiu Ainaro

Diretora PNDS, Dulce Guterres Junior Esplika Hela Objetivu Monitorizasaun Konjunta Ko-naba Ezekusaun Orsamento Implementasaun Faze 3 Siklu 2 iha Suku Maulau, Postu Maubisse, Munisipiu Ainaro

Ekipa konjunta ne’ebe Kompostu husi Ministeriu Administrasaun Estatal, Ministeriu Finansas no ST. PNDS halao Monitorizasaun konjunta ne’ebe foka konaba Sistema finansas iha implementasaun programa Nasional Dezenvolvimentu Suku faze 3 siklu 2 halao durante semana ida hahu husi 23 ate 27 de Setembro 2019. Aktividade ne’e konsentra iha Postu Turiscai Munisipiu Manufahi no Postu Maubisse Munisipiu Ainaro.

Iha Postu Administrativo Maubisse Diretora PNDS, Dulce Guterres Junior hateten Objectivu husi Monitorizasaun ne’e  atu hare no garante katak komunidade liu-liu ekipa jestaun suku (EJS) iha ona kapasidade hodi halo rejistu no relatoriu finansas kada fulan no politika finanseiru iha nivel suku tuir duni matadalan PNDS hodi garante kualidade projetu implementasaun tuir padraun no mos jestaun finanseiros  mata dalan PNDS.

Nune’e Diretora Husu ba Ekipa Jestaun Suku sira atu labele sente tauk katak ekipa husi Nasional halo Audit ba sira, maibe intensaun principal mak atu hadia hamutuk failansu balun ne’be ‘e mak akontese iha jestaun finansas nian atu iha future bele jere ho diak liu tan orsamento ne’ebe aloka ba suku hodi implementa projetu infraestrutura ho eskala ki’ik.

Iha Munisipiu Manufahi Postu Administrativo Turiscai, aktividade Monitorizasaun konjunta halao iha suku sia, enkuantu iha Munisipiu Ainaro Postu Administrativo Maubisse konsentra iha suku hitu, alende hare kona-ba relatori finansas ne’ebe foka kona-ba gastu operasional no infraestrutura  ekipa konjunta mos vijita terreno hodi hare besik liu progresu fisiku implementasaun projetu.

Chefe Departamento M&E, Fortunato Godinho hamutuk ho ekipa verifika hela dokumento finansas konaba ezekusaun orsamentu iha suku Matorek, Postu Turiscai, Munisipiu Manufahi

Chefe Departamento M&E, Fortunato Godinho Hamutuk ho Ekipa Verifika Hela Dokumento Finansas Konaba Ezekusaun Orsamentu iha Suku Matorek, Postu Turiscai, Munisipiu Manufahi

Rejultado husi monitorizasaun konjunta ne’e tantu husi Postu Turiscai Munisipiu Manufahi no Postu Maubisse Munisipiu Ainaro hatudu katak jestaun finansas iha suku sira iha valor mediu to’o iha valor ne’ebe diak. Rejultado ida ne’e bele nota iha suku Orana no Lesuata iha Postu turiscai ne’ebe hetan valor 10, enkuantu iha Postu Maubisse Munisipiu Ainaro Suku Manelobas no suku Horai-Quik hetan valor 10.

Nune’e mos husi vijita terreno hatudu katak projetu infraestrutura basic hirak ne’ebe komunidade sira implmenta kuaze projetu hotu lao diak no tuir dezenu maibe presija monitorizasaun ativo husi fasilitador postu tantu tekniku, social no finansa hodi akompanha ekipa jestaun suku no komunidade sira hodi implementa ho kualidade infraestrutura basiku ne’ebe hari’I iha komunidade nia le’et.