Ekipa Sekretariadu Tekniku PNDS Nasional Verifika hela dadus MIS konaba projetu adisional no altersaun iha Munisipiu Covalima
Monitorizasaun ba sistema manajamentu informasaun (MIS) ne’ebé hala’o husi Sekretariado Tekniku PNDS iha Munisipiu Covalima hala’o iha 12/02/2018.
Monitorizasaun ne’e lidera husi Chefe Departamentu implementasaun programa PNDS, Marcio Marcal no akompanha husi pesoál enjineiru Nasionál, sosial, jestaun keisa no komunikasaun.
Iha monitorizasaun ne’e nota katak implementasaun sistema manajamentu informasaun iha Munisípiu Covalima lao diak mesmu iha dadus balun husi lista projetu mak ladauk hatama iha dadus MIS Nasional liu-liu kona ba lista projetu adisional, no lista projetu alterasaun projetu.
Tuir dadus MIS Nasionál total projetu adisional no alterasaun iha Munisípiu Covalima hamutuk walu (8) maibé wainhira ekipa identifika iha tereno nota katak projetu adisional no alterasaun hamutuk sanulu resin.
Diretora Delegasaun PNDS Munisipiu Covalima esplika hela dadus projetu adisional no alterasaun husi Munisipiu Covalima nian
Husi total projetu nee projetu ida (1) canselado , lima (5) iha dokumentus kompletu no hatama ona iha dadus MIS Nasionál, hat (4) iha dokumentus maibé la dauk hatama iha dadus MIS Nasionál no rua (2) seluk hatama ona iha dadus MIS Nasionál maibé dokumentus seidauk submete husi nivel postu ba Munisipiu hodi kontinua hatama iha dadus MIS Nasionál.
Nune’e ekipa rekomenda ba parte Munisipiu atu toma asaun hodi bele kompleta lalais dokumentus ne’ebé seidauk submete husi Postu ba Munisipiu atu bele hatama iha dadus MIS Nasional. Hafoin verifika dadus MIS ekipa kontinua observa projetu bee mos iha suku Beko hodi buka solusaun ba difikuldades ne’ebé komunidade sira enfrenta.
Entretantu husi sorin seluk wainhira ekipa hala’o monitorizasaun implementasaun projetu uma ofisiál polísia suku hatudu progresu nebe lao diak no prontu ona atu kontinua ho instalasaun / monta uma kakuluk no plafon husi kompanha Galvalindo ne’ebé manan tender tuir Lei aprovionamento.
