Vice Ministru da Administrasaun Estatal, Tomas do Rosario Cabral Abertura Enkontru PIIM Nivel Nasional, Iha Timor Plaza, Dili.
Diskusaun ba proposta plano Investimentu Integrado Munisipal ne’ebé mai husi Aldeia no Suku hotu iha territóriu Timor Leste, Quinta feira nee hahú diskuti iha Nivel Nasional, molok aprejenta ba conselho Ministro hodi hetan aprovasaun. diskusaun nee hala’o iha Timor Plaza Dili, 06/04/2017.
Vice Ministro da Administrasaun Estatal, Tomas do Rosario iha abertura ba enkontru nee hateten enkontru Plano Investimentu Integrado Munisipal iha nivel nasionál atu diskuti klean proposta Plano Investimentu Integrado Munisipal (PIIM) ne’ebé sei implementa iha Tinan fiskal 2018 nian.
Vice Ministru Estatal hateten Oras nee dadaun komunidade halerik hela kondisaun infraestruturas basiku, hanesan kondisaun estrada rural, menus bee mos, eskola laiha kondisaun, no infraestrutura basiku seluk. Nune’e iha diskusaun nee sei fo prioridades atu bele tau atensaun liu kona-ba kondisaun hirak nee tanba iha orsamentu geral 2017 orsamentu estado ladauk tau atensaun masimu kona-ba kondisaun infraestrutura basiku hirak nee, ho nune’e iha proposta ba plano investimentu integrado Munisipal tengki tau atensaun liu ba kondisaun infraestrutura basiku hodi bele rejolve difikuldades ne’ebé komunidade sira enfrenta.
Presidente Autoridade Munisipal no Administrador Munisipiu Sira simu Livru Rekapitulasaun Proposta PIIM neebe rekapitula ona iha Nivel Nasional.
Enkontru ne’ebé foka kona-ba proposta Plano Investimentu Integrado Munisipal nee, koalia mos kona-ba implementasaun dekretu lei governo lokal no lei elisaun Munisipal ne’ebé sei diskuti iha Parlamentu Nasional Semana oin, lei rua nee mak sei sai hanesan baze fundamental ba implementasaun orsamentu estado iha tinan 2018.
Enkontru nee konta ho prezensa Ministra Solidaridade Sosial no Ministra Interina da Educasaun, Presidente Autoridade Munisipal, Administrador Munisipiu no Direktur Linha sektorais sira.
