Ekipa Tékniku Sosiál PNDS husi Munisípiu Dili, hala’o treinamentu modul F ba Ekipa Jestaun Suku (EJS) kona-ba involvementu feto iha implementasaun Programa Nasionál Dezenvolvimentu Suku (PNDS), Becora-Dili (02/07/2015).
Partisipante sira kontente ho treinamentu nee tanba bele aumenta sira nia abilidade iha area oi-oin.
“Treinamentu nee ajuda tebes ami, tanba bele aumenta ami nia koñesimentu oinsá feto mós sai lideransa komunitariu, foti desizaun no bele jere programa iha Suku laran”, Dominggas Laura Belo Soares, Chefe EIP Suku Bidau Lecidere, Postu Administrativu Nain Feto.
Director Delegasaun PNDS, Municipiu Dili, Tadeu Francisco de A. Soares halo intervensaun iha treinamentu modul F
Iha treinamentu ne’e partisipa mós Diretór Delegasaun PNDS Munisípiu Dili, Sr. Tadeu Francisco de A. Soares iha ninia intervensaun hatete katak treinamentu ida ne’e importante tebes ba Ekipa Jestaun Suku (EJS) liu-liu oinsá atu dezenvolve kapasidade involvementu maluk feto sira nia hodi sai hanesan lider iha komunidade, bele foti desizaun nomós bele jere programa PNDS iha Suku laran.
Treinamentu modul F hanesan parte kontinuasaun husi treinamentu modul B ne’ebé espesífiku liu ba iha kapasitasaun ba maluk feto sira ne’ebé assume kargu nu’udar jestor iha Suku hanesan membru EJS nomós Fasilitador feto iha Suku. EJS rasik kompostu husi Komisaun Planeamentu Akontabilidade (KPA), Ekipa Implementasaun Programa (EIP), Ekipa Operasaun Manutensaun (EOM).
Matéria treinamentu ne’e rasik foka liu kona ba oinsá atu hasa’e abilidade involvementu feto iha serbisu ekipa, serbisu entre grupu no oinsá feto bele iha aten barani hodi hato’o ninia opiniaun kona ba dezenvolvimentu ne’ebé Komunidade Suku hakarak atu dezenvolve iha sira nian Suku.
Treinamentu ne’e rasik partisipa husi ekipa jestaun Suku, hamutuk ema nain 40 resin mai husi Suku 20 husi Postu Administrativu 3 mak hanesan Vera Cruz, Nain Feto no Cristo Rei, Munisípiu Dili.
Alende ne’e, treinamentu hanesan hala’o mos iha Postu Administrativu Dom Alexio iha loron 22 fulan Juñu 2015 liu ba, total partisipantes 19 husi ekipa jestaun suku mak partisipa, mai husi suku 4 mak hanesan Suku Komoro, Fatuhada, Kampung Alor no Bairo Pite.
-
- Carol Martins dos Reis Barreto, hanesan FSPA Cristo Rei, fasilita treiamnetu ba EJS
-
- Partsipantes sira apresenta diskusaun grupu
-
- Partisipantes sira apresenta sira nia espetativas kona ba treinamentru
-
- Ekipa Jestaun Suku halo diskusaun ba materia ne’ebe fo husi Fasilitador Sosial Postu Administrativu
