Primeiru Ministru, Rui Maria de Araujo Deklara PNDS Sei Kontinua

Primeiru Ministru, Rui Maria de Araujo, ofisialmente inagura sentru komunitariu multi propozitu iha Suku Soro, Ainaro

“Governu tenta halo esforsu nafatin hodi halo dezenvolvimentu iha imi nia Suku liu husi programa hanesan ne’e (PNDS), tinan ida ne’e inagura sentru komunitáriu, tinan oin inagura fali buat seluk, dezenvolvimentu ne’e sei la para no programa ne’e la’o ba oin nafatin ”. Deklara husi Primeiru Ministru, Rui Maria de Araujo iha inaugurasaun sentru komunitáriu multi propózitu iha Suku Soro, Postu Administrativu Ainaru Vila, Munisípiu Ainaro (14/03/2015).

Primeiru Ministru, Rui Maria de Araujo sujere ba komunidade sira atu asegura didi’ak fasilidade estadu ne’ebé iha, tanba fasilidade hirak ne’e dezenvolve ho sakrifísiu komunidade ninia.

Sentru Komunitariu multi funsaun iha Suku Soro

“Tenke kuidadu fasilidade estadu hirak ne’e ho di’ak, labele estraga, tanba fasilidade hirak ne’e atu fasilita imi nia atividade hodi dezenvolve imi nia Suku. Fasilidade estadu ne’e hanesan imi nian, ita espera katak ho programa PNDS, sei halo buat barak iha imi nia Suku”, hato’o husi Primeiru Ministru Rui Maria de Araujo.

Primeiru Ministru mós informa katak programa PNDS ne’ebé uluk jere husi Ministériu Estatál, sei muda hodi tutela ba iha Ministériu foun, Ministériu Planeamentu no Investimentu Estratéjiku.

Primeiru Ministru, RMA passa revista ba livru gastu orsamentu komunidade iha implementasaun programa PNDS

Alende halo inagurasaun, Primeiru Ministru Rui, pasa revista mós ba livru orsamentu komunidade ninia ne’ebé prepara, liu-liu kona-ba gastus orsamentu ba operasional ho infraestrutura, no nia kontente tebes ho prosesu programa PNDS ne’ebé hatudu rezultadu di’ak liu-liu iha parte konstrusaun, tanba iha implementasaun konstrusaun ne’e implementa direita husi komunidade no komunidade siente katak sira mak sei sai nain ba konstrusaun ida ne’e iha futuru mai.

Iha identifikasaun prioridade suku Soro, komunidade deside hamutuk Sentru komunitáriu multi funsaun mak sai hanesan prioridade as, tanba durante períodu naruk nia laran komunidade suku ida ne’e difisil tebes atu asesu ba fatin públiku ne’ebé mak bele akumula komunidade sira bainhira atu simu programa sosiál ruma husi governu ba iha aldeia no suku ezemplu hanesan programa pagamentu ba ferik katuas sira, programa Siska, programa agrikultura, programa eduksaun nomós programa relevantes sira ne’ebé tun ba iha Suku. Iha futuru komunidade Suku Soro sei la dúvida tan kona ba fatin públiku, tanba fatin ne’ebé konstrui liu husi programa PNDS finalmente ramata no hetan inagurasaun husi Primeiru Ministru, Rui Maria de Araujo.

Cipriano de Araujo hanesan Xefe Suku Soro, agradese ba governu tanba implementa ona programa PNDS iha Suku iha territóriu, nia husu ba governu atu bele kontinua nafatin programa ida ne’e tanba benefísiu husi programa ida ne’e direitamente ba iha komunidade. Xefe Suku mós hatete katak hamutuk ho komunidade planu tuir mai iha suku ida ne’e sei fo atensaun liu ba infraestrutura bázika hanesan konstrusaun bee mós ho rehabilitasaun estrada iha Suku laran ne’ebé liga ba aldeia 4.

Suku Soro iha aldeia 4 mak hanesan aledia Guerudo, Leolala, Poelau no Terlora. Aldeia Leolala mak sai hanesan fatin ba konstrusaun Sentru multi funsaun tanba aldeia refere mak sai hanesan fatin sentrál ba komunidade sira husi suku ida ne’e. Total komunidade ne’ebé hetan benefísiu hamutuk iha xefe família 408. Sentru ida ne’e konstrui ho subsídiu Suku 35,000,00 dolares Amerikanu, inklui instalasaun MCK/sentina públiku.

© Copyright 2015 Programa Nasional Dezenvolvimentu Suku