Presidente Autoridade fo apresiasaun ba servisu komunitaria ne’ebe halao liu husi programa PNDS
“Ha’u hare deit eskola ne’e iha foho tutun, ha’u husu ba ha’u nia an rasik, rai henek ho fatuk mai husi ne’ebé ? bee mai husi ne’ebé ? Se la iha partisipasaun komunidade ninia, susar tebes ho subsídiu oituan, bele halo servisu hanesan ita bo’ot sira halo ne’e”.
Apresiasaun ida ne’e hato’o husi Dr. Mari Alkatiri, Prezidente Autoridade Região Administrativa Especial Oé-cusse Ambeno (RAEOA) e Zonas Especiais de Economia Social de Mercado (ZEESM), iha Inagurasaun Projetu Programa PNDS Aumenta Sala Foun Eskola, iha Aldeia Fatu-bijae, Suku Bobocasse, Pante-Macasar-Oé-cusse (22/04/2015).
Prezidente Autoridade RAEOA e ZEESM Mari Alkatiri, fo parabens ba komunidade Suku 8 husi Postu Administrativu Pante-Macassar ne’ebe mai partisipa iha inaugurasaun ne’e, tanba bele hatudu katak komunidade sira komprende duni programa PNDS ninia hakarak, no sira partisipa duni iha prosesu tomak programa ninia, atu nune’e mesmu ho subsídiu Suku ne’ebé ki’ik, komunidade sira utiliza duni rekursu ida ne’e hodi dezenvolve sira nia suku.
Virgilio Dedeus, hanesan Xefe Suku Bobocasse hanesan mós reprezenta Xefe Suku tomak husi Postu Administrativu Pante-Macasar, iha ninia diskursu apresia tebes programa PNDS, tanba iha programa ida ne’e hatudu katak governu hakbesik dau-daun ona hodi rezolve problema dezenvolvimentu ne’ebé komunidade sira enfrenta iha baze.
Virgilio de Deus, hanesan Xefe Suku Bobocase, iha ninia diskurus hato’o agradesimentu ba Governu hodi implementa politika programa PNDS ba territoriu tomak
Iha oportunidade ne’e lider komunitáriu husi Postu Administrativu Pante-Macasar hato’o mós agradesimentu ba V Governu konstitusionál ne’ebé lidera husi Eis-Primeiru Ministru/Actual Ministru do Planeamento e Investimento Estratégico Exelénsia Kay Rala Xanana Gusmão, ne’ebé hamosu ona polítika governu hodi implementa Programa Nasionál Dezenvolvimentu Suku (PNDS), no sujere ba VI Governu hodi mantein nafatin programa nasionál ida ne’e tanba responde duni komunidade ninia ejijénsia iha Suku no Aldeia.
Suku Bobocase iha Aldeia 2 mak hanesan Aldeia Fatu-Bijae ho Aldeia Bihala, Suku ida ne’e implementa programa PNDS iha Faze ba dahuluk, subsídiu suku programa PNDS ne’ebé aloka ba iha Suku ida ne’e ho nia montante $45,000.00 (inklui Subsídiu Operasional : $5,500.00 ho Subsídiu Infraestrutura : $39,500.00).
Husi subsídiu infraestrutura iha leten, komunidade Suku Bobocase konsege utiliza hodi halo projetu programa PNDS 3 mak hanesan : Konstrusaun Sala Foun/Aumenta Sala rua Eskola Filial iha Aldeia Fatu-Bijae ho orsamentu :$17,357.50, Rehab kanaliza bee mos ho total orsamentu :$18,577.70 no ikus liu Konstrusaun Sanitasaun Públiku ba estudante ho total orsamentu $3,565.00. Projetu hirak ne’e implementa direita husi komunidade liu husi servisu rotativa.
Subsídiu Operasionál : utiliza apoiu ba formasaun, sorumutu, selu insentivu, administrasaun no kustu seluk, Subsídiu Infraestrutura : utiliza hodi sosa materiáis konstrusaun no selu Traballador sira ne’ebé kontribui iha implementasaun projetu programa PNDS.
PNDS hanesan programa komunitária, espera katak ho programa ida ne’e komunidade bele hetan benefísiu no siente rasik rezultadu projetu ne’ebé mak sira rasik implementa.
-
- Presidente autoridade akompanna husi Sra. Ms Neryl Lewis Councillor for Rural development husi Governo Australia, hare besik liu konstrusaun ne’e halo rasik husi komunidade
-
- Presidente Autoridade RAEOA e ZEESM akompana husi Diretora Dulce, selebra inagurasaun hamutuk komunidade ho ko’a keck.
-
- Eskola oan sira kontenti tanba iha ona espasu atu akumula sira hodi tuir prosesu aprendijajen
-
- Diretora Dulce (kajaku metan) ho Diretor Aderito akompana husi Assesor, ekipa komunikasaun, funsionariu PNDS RAEOA inklui FST foto hamutuk iha plaka inagurasaun projetu Programa PNDS
