Vice Ministro Administrasaun Estatal, Abilio Jose Caetano Akompanha husi Reprezentante Embaxador Australia Erin Aleeson, Ofisialmente Tesi Fita Simbolu Inaugura Be’e Mos iha Suku Atara.
Vice Ministro Administrasaun Estatal, Abilio Jose Caetano Hala’o Intervensaun ba Inaugurasaun Be’e Mos iha Aldeia Uabe, Suku Atara.
Konstrusaun Be’e Mos ne’ebé konstrui iha aldeia Uabe, Suku Atara, Postu Administrativu Atsabe, Munisípiu Ermera ho orsamentu husi Governu ne’ebé aloka liu husi Programa Nasional Dezenvolvimentu Suku (PNDS). Konstrusaun ofisialmente inaugura husi Vice Ministru Administrasaun Estatal ne’ebé Akompanha husi Reprezentante Embaxador Australia, Adminsitrador Postu Atsabe no Asiste husi komunidade suku Atara. Atividade inaugura ne’e hala’o iha loron (14/02/2020).
Chefe Suku Atara Aprezenta Relatori Konstrusaun Be’e Mos iha Suku Atara.
Konstrusaun Be’e Mos ne’e hanesan preokupasaun bot ida ba komunidade suku Atara ne’ebé maioria komunidade Aldeia Uabe, Suku Atara halerik tanba tinan barak komunidade suku refere susar atu hetan be’e mos no kuru deit iha mota ho distánsia ne’ebé dok.
Implementasaun Programa Nasional Dezenvolvimentu Suku iha suku Atara ne’ebé implementa husi ekipa Jestaun Suku no komunidade, Projetu konstrusaun Be’e Mos ne’ebé uja sistema gravitasaun ho distasia 2 kilometru no ho total Torneira Publik 9, Tangki Rezervatorio 2 ho medida 14 m3, Ponte Pipa 1 ho naruk 1800 m, no Lavandaria 3 ho total orsamentu hamutuk $52,964.83 ho gastu $47,406.87 no nia balansu hamutuk $ 5,557.96 ne’ebé mak iha kontabakaria suku no Kostrusaun Be’e Mos ne’e Benefisiariu ba komunidade Aldeia Uabe, Suku Atara hamutuk Uma Kain 90, kompostu husi Feto hamutuk 241 no Mane hamutuk 252.
Vice-Ministru Administrasaun Estatal, Abilio Jose Caetano hafoin inaugura Be’e Mos ne’e iha nia diskursu, kontente no apresia ho resepsaun husi komunidade suku Atara ho sira nia kultura. Iha fatin hanesan mos Vice Minisitru hatete katak Be’e mos hanesan nesidade bazik ida ba komunidade hotu husi Oecusse to Tutuala no apela ba komunidade sira tengke partisipa no dezenvolve rai ida ne’e.
Diretora PNDS Nasional Dulce Guterres Junior Akompanha husi Diretora Delegasun PNDS Munisipiu Ermera Hamutuk ho Komunidade Suku Atara Halo Tuir Tradisaun Cultura Suku Atara.
Ho nune’e Vice-Ministro Abilio Jose Caetano apela ba Chefe Suku, Chefe Aldeia no komunidade suku Atara katak projetu Konstrusaun ne’ebé inagura ona labele tinan oin ita la uja ona maibe tenke iha nia kontinuidade no susteinabilidade tanba fo benefisu ba ita hotu.
Iha fatin hanesan Reprezentante Embaxador Australia ba Timor-Leste Erin Aleeson ne’ebé partisipa iha inagurasaun ne’e hato’o nia sentimentu kontente tebes tanba hetan konvite husi komunidade suku Atara no Nia mos hato’o durante tinan hira nia laran bele servisu hamutuk ho Governu Timor Leste Liu husi Programa Nasional Dezenvolvimentu Suku ne’ebé governu Australia fo apoiu liu husi asistensia Tekniku ba ekipa PNDS sira Erin Aleeson hatutan mos katak iha inaugurasaun Be’e Mos ne’e hanesan fatin ida ne’ebé premeiru ves ida hakat mai iha Postu Atsabe liu-liu iha suku Atara.
Hola parte husi Serimónia inaugurasaun ne’e mak Vice Ministru MAE, Administrador Postu Munisípiu Ermera, Reprezentante Embaxador Australia, Komandante Polisia Postu Ermera, Liñas Ministerial Munisipiu Ermera, Chefe Gabinete MAE, Diretor Geral, Diretor/a Nasional MAE, Diretora PNDS Nasional, Diretor Delegasaun PNDS Munisípiu Ermera, PARTISIPA Autoridade lokal Postu Administrativu Atsabe, Funsinariu PNDS Nasional no Munisípiu Ermera no Komunidade Suku Atara.
