Administrador Munisipiu Manufahi Carlito pinhero Loke enkontru Avaliasaun Annual PNDS Munisipiu Manufahi, iha Salaun Enkontru Munisipal (29/03/2017).
Avaliasaun Annual hanesan atividade ne’ebé hala’o hodi hare hikas susesu no dezafiu implementasaun Programa PNDS ne’ebé implementa iha territóriu tomak. Iha Munisipiu Manufahi Avaliasaun Annual ba implementasaun PNDS siklus dahuluk hala’o iha salaun enkontru Munisipal Manufahi ( 29/03/2017)
Administrador Munisipiu Manufahi Carlito Pinhero, ne’ebé loke enkontru avaliasaun nee hateten Prezensa PNDS iha Munisipiu Manufahi hamosu mudansa signifikadu tanba ajuda tebes komunidade hodi rejolve sira nia difikuldades ne’ebé sira enfrenta.
PNDS hanesan Programa Governo ne’ebé partense husi Ministeriu da Administrasaun Estatal, tuir Administrador ho programa PNDS bele hasae kompartamentu serbisu Ministeriu nian iha Nivel Nasional kampara ho Ministeriu seluk, públiku bele hare katak serbisu ne’ebé Ministeriu nee halo korresponde duni difikuldades ne’ebé komunidade sira enfrenta iha baze. Entrentantu tuir Diretor Delegasaun PNDS Munisipiu Manufahi, Sidonio Gusmao, enkontru avaliasaun nee sei foka kona-ba implementasaun programa PNDS siklu dahuluk nian liu-liu iha aspetu gestaun finansas, sosial no aspetu tékniku.
Diretor Delegasaun PNDS Manufahi aprezenta progresu implementasaun PNDS nivel Munisipiu Manufahi.
Diretur Delegasaun PNDS nee, afirma mos katak ho prezensa PNDS iha Munisipiu Manufahi, iha implementasaun Programa PNDS siklu dahuluk liu husi orsamentu estado ne’ebé aloka ba konta bankaria suku nian, fungsionariu PNDS Munisipiu Manufahi fasilita ona komundade sira hodi konstrui projetu infraestrutura basiku ne’ebe ligado barak ho sectoral sira mak hanesan bee mos, irigasaun, estrada rural, ponte kiik hamutuk lima nulu resin nen (56).
Husi avaliasaun nee, entrega mos premiu apresiasaun ba suku ne’ebé implementa programa PNDS ho diak, selesaun ba suku manan nain hare husi aspetu gestaun finansas, sosial, no tékniku. Suku hirak nee mak Suku Aituha hanesan primeiru lugar, segundu lugar Suku Betano no suku Bubususu iha terseiru lugar. Premiu ba suku manan nain sira mak alende simu taxa apresiasaun sira mos simu kadeira hodi bele fasilita sira nia aktividade suku nian wanhira sira organiza sorumutu suku nia.
