Ministru Administrasaun Estatal, DR. Miguel de Carvalho Asina Plaka simbolu inaugurasaun projetu PNDS iha Postu Laclo, Munisipiu Manatuto
Konstrusaun Escola Baziku Filial (EBF), suku Lacu-Mesac postu Administrasaun Laclo, Munispiu Manatuto ho Orsamentu husi Governu ne’ebé aloka liu husi Programa Nasional Dezenvolvimentu Suku (PNDS). Konstrusaun ne’e ofialmente inaugura husi Ministru Administrasaun Estatal no ministru Edukasaun Joventude no Desportu ne’ebé akompanha husi Embaixador Australia, Adminitrador Munisipiu Manatuto no asiste husi komunidade suku Lacu-Mesac, Atividade inaugurasaun ne’e hala’o iha loron 10/07/2020.
Konstrusaun Escola Baziku Filial (EBF) Cara, suku Lacu-Mesac hanesan preokupasaun bo’ot ida ba Inan no Aman liu-liu estudante Escola Baziku Filial (EBF) Cara, iha suku Lacu-Mesac ne’ebé durantre ne’e estudante sira uja sala escola ne’ebe diding ho deit piku hodi hala’o prosesu aprendijajen iha escola refere. Implementasaun ba Konstrusaun Programa Nasional Dezenvolvimentu Suku iha suku Lacu-Mesac ne’ebe implementa husi ekipa jestaun suku no komunidade hamutuk projeitu 6 mak hanesan Konstrusaun Rezidensia ba Profesores Escola Báziku Central (EBC) iha Remanaru, Konstrusaun Escola Baziku Filial (EBF) Cara, Konstrusaun Be’e Kanu/Kanu Distribusaun iha Condar, Konstrusaun Sistema Be’e Mos Gravitasaun iha Ilimano, Konstrusaun Lutu Escola Baziku Filial (EBF) iha Bua, no Konstrusaun Klinika Maternidade iha Mantane, total Orsamentu ba projeitu 6 ne’e hamutuk $161,327.95 ho Gastu $154,203.52 no Balansu $7,124.43.
Ministru Administrasaun Estatal Dr. Miguel Pereirra de Carvalho iha nia intervensaun espresa sentimentu kontenti tebes ba konvite ne’ebé mai husi komunidade suku Lacu-Mesac hodi inaugura Escola Báziku Filial (EBF) Cara ne’ebé konstrui husi PNDS. Ministru reafirma PNDS hanesan bebe ida ne’ebé uluk nia rasik mak inisia hamutuk ho kolega sira seluk iha tinan 2011 to ohin loron sei moris no bot liu tan, nune’e ministru apela ba komunidade sira atu tau matan no kuidadu obra ne’ebé iha tiha ona hodi bele uja ba iha tinan naruk.
Directora Nasional PNDS, Dulce Guterres Junior hamutuk ho Administrador Munisipiu, Postu no Suku Asina Plaka simbolu inaugurasaun ba projetu hotu ne’ebe PNDS konstrui iha Postu Laclo, Manatuto
Iha fatin hanesan Administrador Munisípiu Manatuto, Fernando Sousa, agradese ba governu central tanba bele halo dezelvolvimentu iha postu administrativo Laclo no husu ba komunidade suku Lacu-Mesac atu tau matan no kuidadu Konstrusaun sira ne’ebé ohin loron konstrui iha Postu Administrativu Laclo hodi bele uja ba tinan naruk.
Inaugurasaun eskola Filial ne’e simbolika ho asina plaka ba projeitu konstrusaun sala Escola Baziku Filial (EBF) Cara ne’ebe asina husi Ministru Administrasaun Estatal, enkuantu Administrador Munisípiu Manatuto, Diretora Nasional PNDS, Administrador Postu Laclo, no Chefe Suku Lacu-Mesac mos asina plaka projeitu Canalizasaun Be’e Mos, Uma Maternidade, Uma ba Profesor sira no Irigasaun ne’ebé nia implementasaun finaliza tiha ona.
Alende inaugura konstrusaun ba Escola Baziku Filial (EBF) Cara, Ministru mos fahe sertifikadu ba ekipa sira hanesan apresiasaun ba ekipa ne’ebé durante ne’e kontribui maka’as ba implementasaun Programa Nasional Dezenvolvimentu Suku, iha suku Lacu-Mesac, Postu Administrativu Laclo.
