Ministru Administrasaun Estatal, Dr. Miguel Pereira de Carvalho, Ofisialmente Asina Plaka iha Inaugurasaun Projetu Estrada Rural iha Suku Ritabou, Postu Maliana Villa.
Projetu estrada rural ne’ebe inaugura husi Ministru Administrasaun Estatal, iha suku Ritabou, nudar projetu ne’ebe implementa iha faze 3 siklus 2,. Aktvidade inaugurasaun iha Suku Ritabou realiza iha loron sabdo, 25/07/2020.
Ministru Administrasaun Estatal, Miguel Pereira de Carvalho iha nia intervensaun espresa sentimentu kontente tanba komunidade sira bele fo sira nia tempu hodi bele sai sasin ba inaugurasaun projetu ne’e, Programa ne’e hari’I ona besik tinan sia, komunidade sira rasik mak halo ona projetu imfraestrutura basiku hamutuk 1.652 ne’ebe laos companha ou seitor pribadu sira mak halo maibe komunidade rasik mak halo, liu husi programa ne’e mak komunidade sira bele deside rasik prioridades saida mak sira sente necesariu duni atu konstrui iha sira nia suku.
Ministru Administrasaun Estatal, Dr. Miguel Pereira de Carvalho, Akonpanya Husi Presidente Autoridade Munisipal Bobonaro no Diretora Actual PNDS NAsional no Komunidade Suku Ritabou Simbolu Tesi Pita Inaugurasaun Projeitu Estrada Rural.
Ministru Administrasaun Estatal ne’e relembra katak ita hotu imajina tok enkuantu, se governo la hari’I programa ne’e oinsá mak komunidade sira bele partisipa direita iha dezenvolvimentu, liu-liu dezenvolvimentu iha nivel suku, tanba ne’e ita apresia katak programa PNDS nudar oportunidade ne’ebe governo sentral fo ba komunidade sira hodi bele promove partisipasaun aktivu komunidade sira nia iha dezenvolvimentu ne’ebe konsentra iha nivel suku, nune’e bele rezolve komunidade sira nia difikuldades ne’ebe sira enfrenta.
Iha oportunidade hanesan Presidente Autoridade Munisipal Bobonaro, Jeferino Soares relata katak implementasaun programa PNDS iha Munisipiu Bobonaro durante tinan 2014 ate 2020 hamutuk projetu 149 ne’ebe implementa ona iha suku 50 iha Munisipiu Bobonaro, husi total projetu ne’e, be’e no saneamentu 42 projetus, edukasaun projetu 6, saude projetu 2, dalan, ponte no kontrola de seias projetu 63, Agrikultura, buka moris no seitor seluk hamutuk projetu 17, inklui projetu faze 3 siklu 2 ne’ebe implementa iha 2019 ate 2020 hamutuk projetu 18.
Ministru Administrasaun Estatal, Dr. Miguel Pereira de Carvalho Vijita Projeitu estrada Rural Ne’ebe Implementa Husi PNDS iha Suku Ritabou.
Entretantu Diretora Sekretariadu Tekniku PNDS, Claudinha Soares Pinto wainhira dada lia ho Grupu Media Nasional TV (GMN TV), informa katak plano implementasaun tuir mai mak PNDS sei implementa fundus Surtu Covid ne’ebe mai husi governo Australia ho montante 4,7 Miliaun Dolar Amerikano, orsamentu ne’e sei konsentra iha suku faze 1 siklu 3 hamutuk suku 149.
Total orsamentu projetu estrada rural ne’ebe inaugura hamutuk $ 41.473,5 dolar Amerikano, kompostu husi item, estrada rurais (estrada rai) 250 metru, galeri quadradu (box culver) metru 5, drainagen hada fatuk 250 metru, barreira hada fatuk 97 metru, barreira satan dalan 250 metru. Antes inaugura projetu estrada rural iha suku Ritabou ba dala uluk, Ministru Administrasaun Estatal vijita suku Odomau no suku Holsa hodi hare konstrusaun projetu irigasaun no projetu estrada betaun ne’e kontru iha implementasaun faze 3 siklu 2 ne’e obra finaliza ona husi komunidade.
