Ministru Administrasaun Estatal, Valentim Ximenes observa projetu bee mos iha Suku Raimea, Postu Zumalai, Munisipiu Covalima.
Ministro Administrasaun Estatal, Valentim Ximenes liu husi nia vizita terreno dezafia komunidade husi suku Raimea wainhira observa Projetu bee mos ne’ebé konstrui iha suku Raimea, Postu Zumalai, Munisipiu Covalima iha 10/11/2017.
Intalasaun bee mos ho sistema bomba ne’ebé konstrui iha suku refere implementa ho orsamentu estado ne’ebé aloka liu husi implementasaun programa PNDS.
Wainhira observa kondisaun real kanalizasaun bee mos nee, Ministro Valentim Ximenes hateten ohin imi nia difikuldade kona-ba falta bee mos responde ona, hau hakarak hare iha futuru saida mak imi sei halo ho bee ne’ebé imi iha, imi tengki badinas no serbisu maka’as.
Ministro, Valentim Ximenes dezafia komunidade sira atu la uza deit bee refere hodi komsume maibé utuliza mos bele hala’o aktividade seluk hanesan kuda modo, hakiak ikan no aktividade hortikutura ne’ebé bele fo rendimentu ruma iha uma laran hodi ajuda imi nia moris.
Komunidade Suku Raimea, Postu Zumalai, Munisipiu Covalima Kuru ona be’e ne’ebe kontrui husi PNDS.
Entertantu Chefe Suku Raimea, Januario Nahak Gomes iha oportunidade nee agradese ba governo tanba governo liu husi programa PNDS bele responde ona sira nia difikuldades kona-ba falta bee mos.
Chefe suku hateten difikuldades kona-ba bee mos iha suku nee komunidade enfrenta durante tempu naruk, agora sira bele ona kuru bee besik, nune autoridade nee promete sei mobiliza no motiva komunidade sira hodi hala’o aktividade ekonómiku seluk ne’ebé bele fo rendimentu ruma ba komunidade.
Projetu bee mos nee rasik konstrui ho orsamentu Governo ne’ebé aloka liu husi programa PNDS ho montante orsamentu ba infraestrutura rihun 58,000 no orsamentu operasional rihun 5.119,15 husi orsamentu nee mak konstrui tanki rezerva rua hodi distribui bee ba tornera públiku hamutuk 12, projetu nee rasik tama iha implementasaun programa PNDS fase 1 siklus 2.
