Direktur Interino, Secundino Freitas Moreira hala’o abertura enkontru Koordenasaun Fulan Maio Iha salaun JL.Villa.
Atu kordena di’ak liután servisu iha baze, Sekretariadu Tékniku Programa Nasionál Dezenvolvimentu Suku (ST-PNDS) iha fulan-fulan sempre organiza enkontru kordenasaun iha nivel nasionál, enkontru kordenasaun ba fulan Maio ninia hala’o iha Dili, iha loron 02 fulan Junho 2015.
Direktur Interino no actual hanesan Chefe Unidade Administrasaun Finansas Programa PNDS Secundino Freitas Moreira, iha ninia intervensaun apela ba funsionáriu PNDS tomak tantu iha nasionál nomos iha Munisípiu hotu-hotu atu haka’as an no mantein nafatin dixiplina, atu nune’e bele melhora liu tan servisu ba programa PNDS iha suku no territóriu laran tomak.
Direktur Delegasaun PNDS Munisipiu aprezenta progresu implementasaun PNDS iha Kada Munisipiu.
Enkontru ne’e hanesan atividade rutina ida ne’ebé halo kada fulan-fulan, iha enkontru ne’e kada munisípiu inklui mos departamentu ida-idak aprezenta progresu servisu nomos dezafiu ne’ebé ekipa hasoru iha terrenu atu nune’e bele buka solusaun hamutuk, alende aprezenta rezultadu servisu nomos dezafiu, ekipa ida-idak mos aprezenta mos planu servisu ne’ebé atu hala’o iha fulan tuir mai.
Implementasaun programa PNDS hasoru difikuldade barak, maibe rezultadu husi esforsu atu solusiona difikuldade hirak ne’e mak hatudu ona progresu lubuk ida ne’ebe fo ona benefísiu ba komunidade sira hodi asesus ba infraestrutura bazika no espera katak ho enkontru kordenasaun ne’ebé sempre hala’o kada fulan-fulan hodi diskute progresu no difikuldade ne’ebé enfrenta iha tereno bele hamosu iniasitiva ne’ebé diak ba solusiona difikuldades ne’ebé mosu iha implementasaun atu aslera prosesu dezenvolvimentu iha nivel baze.
Partisipante husi enkontru ne’e kordenadores PNDS husi Munisipiu, Chefe Unidade, Chefe Departementu, Fungsionariu PNDS nomos Asessor Internasional no Nasional, Ekipa Suporta Terrenu Field Support Team (FST) husi Ajensia Cardno ne’ebé durante ne’e fo apoiu ba implementasaun programa PNDS.
