Teniku PNDS halo Aprezentasaun konaba dezenu uma ba policia komunitariu
Konstrusaun Uma ba Policia Komunitariu sanulu resin hat ne’ebé sei konstrui ho orsamentu Doadores ne’ebé hetan apoiu husi Governo Nova Zelandia, tama ona iha etapa diskusaun dezeñu no kustu ba implementasaun obra.
Iha enkontru konsulta saun ne’ebé Sekretariado Tékniku PNDS halo ho komando geral PNTL iha salaun enkontru Ministériu Interior, kontinua diskuti kle’an kona-ba dezeñu no kustu tanba governo Nova Zelandia ne’ebé apoiu orsamentu nee hakarak konstrusaun uma ba policia komunitariu nee uza Sistema PNDS.
Tuir Komandante Geral Policia Nasionál Timor Leste, Komisáriu Julio da Costa Hornai, katak doador sira hakarak uza mekanizmu PNDS hodi implementa Uma sanulu resin hat ba Policia Komunitariu nee tanba tuir avaliasaun ne’ebé doador sira halo katak mekanizmu ne’ebé PNDS uza di’ak no Kapas, tanba nee mak sira propoin atu uza Sistema PNDS hodi Konstrui Uma ba policia komunitariu.
Diretora Nasional PNDS, Dulce Guterres halo Intervensaun iha Enkontru konsultasaun ho komando PNTL
Entretantu Diretora PNDS, Dulce Guterres Junior hateten diskusaun ho komando Geral PNTL kona-ba Sistema PNDS ne’ebé sei uza hodi implementa konstrusaun uma policia komunitariu, atu hare kona-ba lala’ok implementasaun.
Tuir Diretora PNDS, doador propoin uza Sistema PNDS tanba ho mekanizmu PNDS implementasaun obra ho medida ki’ik nune’e sei konstrui ho orsamentu ne’ebé ki’ik inklui fasilidades mobiliarius.
Data fiksu ba implementasaun uma policia komunitariu seidauk determinina iha enkontru nee no depende ba akordu husi Ministru nain tolu, entre Ministru Interior, Ministru Estatal no Ministru Planeamentu Investimentu Estratéjiku, wainhira iha ona akordu entre Ministru nain tolu mak implementasaun hahu realiza.
