Iha loron segunda feira, 24 Agostu 2015, komunidade husi Suku Estadu Postu Administrativu Ermera, Munisípiu Ermera, realiza enkontru akontabilidade final ba implementasaun programa PNDS, objetivu husi enkontru ne’e mak atu informa ba komunidade tomak kona ba ezekusaun orsamentu programa PNDS iha Suku atu nune’e bele garantia transparansia no akontabilidade.
Antonio M. dos Santos, hanesan Xefe Suku Estadu, iha enkontru ne’e informa ba komunidade kona-ba importánsia husi atividade ne’e.
“Enkontru ne’e importante ba komunidade hotu atu rona direitamente husi Ekipa Jestaun Suku (EJS) kona ba gastus orsamentu ne’ebé governu aloka ba suku liu husi programa PNDS”, Antonio M. dos Santos, Xefe Suku Estadu.
Asina minutas enkontru akontabilidade
Suku Estadu Implementa PNDS iha faze I iha fulan Setembru 2013, subsídiu PNDS ne’ebé aloka ba iha Suku ne’e ho montante US$50,000.00, valor orsamentu ida ne’e inklui subsídiu 2 mak hanesan US$44,250.00 ba subsídiu infraestrutura no ba subsídiu operasional iha montante US$5,750.00.
Subsídiu infraestrutura (US$44,250.00) ne’e aloka ba iha projetu 3, sentru komunitáriu multi funsaun rua, ida iha aldeia Sinais ho nia kustu US$19,212.00, ida seluk iha aldeia Railakan ho nia kustu US$ 19,309.00, konstrusaun saniamentu públiku ida, iha aldeia Hamarik Metin ho nia kustu US$5,729.00. Konstrusaun hirak ne’e 100% ramata ona no hein inagurasaun atu nune’e bele intrega ba komunidade hodi utiliza tuir nesesidades ne’ebé iha.
Xefe aldeia 12 ne’ebé partisipa iha eventu ne’e kontente ho atividade ne’e tanba iha implementasaun programa PNDS la’os deit atu responde komunidade ninia problema dezenvolvimentu, maibé kapasita mós komunidade sira oinsá bele tur hamutuk identifika problema dezenvolvimentu iha suku, halo rasik planu no implementa, halo monitorizasaun nomós jere rasik orsamentu ne’ebé governu aloka liu husi programa PNDS.
Rezultadu husi enkontru ida ne’e komunidade tomak aseita tanba ekipa jestaun suku hato’o relatóriu tuir prinsípiu program ninia ne’ebé bele garantia transparansia nomós akontabilidade.
Total partisipante hirak ne’ebé partisipa iha enkontru ne’e mais ou menus iha ema 70 resin, kompostu husi komunidade husi aldeia 12, lider komunitáriu ho konsellu suku. Eventu ida ne’e hetan observasaun direita husi ekipa PNDS nasionál nomós sub nasionál inklui ekipa suporta terrenu/Filed Support Team (FST).
-
- Asina minutas enkontru akontabilidade
-
- Komunidade sira fo ninia intervensaun iha bain hira partisipa iha enkontru akontabilidade
-
- Joao Bosco, nudar Diretor Delegasaun PNDS Munisipiu Ermera fo introdusaun kona ba atividade ne’ebe akontese iha Suku
-
- Ekipa Jestau Suku apresenta papel ida-idak ninia ba komunidade
-
- Diskrisaun kona ba gastus orsamentu infraestrutura suku
-
- Diskrisaun relatoriu kona ba orsamentu operasional
