Rehabilitasaun no Aumenta Sala Klinika iha Suku Lisadila
Rehabilitasaun no aumenta sala foun ho medida 5 x 10 m2 inklui sosa ekipamentus saúde hanesan kama ho kadeira ba pasiente nomós meja servisu ba pesoál saudi iha Postu Klínika Suku Lissadila, Postu Administrativu Maubara fo benefísiu imediatu ba komunidade.
Francisco Xavier dos Santos, nudar pesoál saúde hanesan enfermeiru ne’ebé servisu iha Suku Lissadila sente kontente tanba ho fasilidade ne’ebé iha, sira bele hala’o servisu konsentra deit iha klínika, tanba antes ne’e sira atu ajuda pasiente inan isin rua, sira tenke ba to’o iha pasiente nia uma maske lao dok.
Francisco Xavier, nudar Pesoal Saude iha Suku Lisadila
“Antes ne’e, postu klínika ida ne’e labele atende inan isin rua atu partus tanba fasilidade la iha, ami tenke ba to’o iha pasiente nia uma hodi atende pasiente sira liu-liu ba inan isin rua, maibé agora inan isin rua bele partus iha klínika ida ne’e tanba iha ona fasilidade”, Francisco Xavier dos Santos, Enfermeiru iha Suku Lissadila.
Ancelmo Fernandes, hanesan lider komunitáriu apresia tebes ho programa PNDS, tanba liu husi programa ida ne’e fó duni benefísiu ba nia komunidade nomós komunidade sira husi Suku viziñu.
“Uluk liu, klínika ida ne’e iha deit meja ho armáriu, maibé kadeira ho fasilidade seluk ba pasiente sira la iha, liu husi programa PNDS komunidade deside hamutuk hodi halo konstrusaun aumenta sala foun inklui sosa ekipamentus ba pasiente sira”, Ancelmo Fernandes, Xefe Suku Lissadila, Postu Administrativu Maubara.
Hafoin ramata rehabilitasaun postu klínika ne’e, iha fulan junho liu ba, mais ou menus inan isin rua nain 6 mak partus ona, alende ne’e pasiente jerál ne’ebé mai halo tratamentu saudi loron ida bele liu husi ema nain 25 ba leten.
Komunidade ne’ebé mai halo tratamentu saudi iha klínika ne’e, la’os deit mai husi Suku Lissadila, maibé komunidade husi Suku viziñu hanesan Suku Guisu, Suku Leotela Postu Administrativu Liquisa, Suku Asulau Postu Administrativu Hatolia mós mai halo tratamentu saudi iha fatin ida ne’e, tanba fati ida ne’e sai hanesan Sentru ba Suku sira iha viziñu.
Fasilidades Partus iha Postu Saude Suku Lisadila
Konstrusaun aumenta sala foun ba klínika ida ne’e ninia orsamentu mai husi programa PNDS, total orsamentu ne’ebé aloka ba projetu refere ho nia montante $19,234.49 dolar amerikanu, ne’e inklui ho sosa fasilidades servisu ninia hanesan: kama 4 ba pasiente, Armáriu tau dokumentus ninia 1, Meja servisu 2, Kadeira servisu 2, kadeira ba Pasiente 5, Tralis ka hena hafahe hodi halo tratamentu ka konsulta fatin unidade 4, inklui mós konstrusaun lutu hale’u klínika atu nune’e bele proteje animal labele tama ba area klínika nian, lutu refere halo husi rede ou arame ho nia Volume: 50mX80m.
Suku Lissadila, hanesan suku ida ne’ebé mak izoladu tebes tanba preside iha baliza entre Munisípiu Ermera ho Bobonaro. Alokasaun orsamentu PNDS ba Suku ida ne’e ho montante $55,000.00 inklui fundus 2 (operasional $6,250.00, Infraestrutura $48,750.00).
Husi total fundus infraestrutura $48,750.00 ne’e aloka ba projetu 2 mak hanesan : Rehabilitasaun no aumenta sala ba klinika inklui ekipamentus ho montante : $19,239.75 ho konstrusaun bee mos ho montante orsamentu $29,510.25
-
- Kuadru Informasaun Projetu Programa PNDS
-
- Fatin Konsulta ba Inan Isin rua
-
- Fasilidades Partus iha Postu Saude Suku Lisadila
-
- Francisco Xavier dos Santos, Nudar Pesoal Saude Iha Klinika Suku Lisadila
-
- Rehabilitasaun no Aumenta Sala Postu Saude iha Suku Lisadila, Postu Administrativo Maubara, Municipiu Liquica
-
- Sala Partus ba Inan Isin Rua
