Jose da Conceicao, nu’udar Lia Na’in, agradese ba governu tanba bele responde ona komunidade nia preokupasaun kona ba bee mos
Komunidade Aldeia Raifusa ho Aldeia Leo-Ai, Suku Betano, livre ona husi problema bee mós hafoin governu liu husi Programa Nasionál Dezenvolvimentu Suku (PNDS), servisu hamutuk ho komunidade Suku dada be’e mós husi be’e matan Risoko ba komunidade sira.
Komunidade Suku Betano, liu-liu Aldeia Rai-Fusa ho Aldeia Leo-Ai sente kontente tebes, tanba bele ona asesu direitamente ba be’e mós iha Suku laran.
“Antes ne’e aldeia rua refere, durante iha tempu okupasaun, mós iha tempu ukun an, suspira tebes-tebes ba be’e mós, ho programa PNDS, bele realiza be’e to’o iha ami nia uma oin, no ami kontente tebe-tebes”, Jose da Conceicão, nu’udar Lia na’in.
Iha tempu naruk nia laran be’e mós sai hanesan preokupasaun bo’ot ba komunidade sira iha Suku Betano, komunidade sira tenke la’o dok ba iha be’e matan Risoko hodi kuru be’e ba sira nia moris loro-loron maske asesu ho la’o ain ho nia distánsia km 1 (ida) resin.
Be’e matan Risoko hanesan be’e matan lulik ida ne’ebé iha nanis ona iha tempu bei’ala sira, be’e ida ne’e iha liu rai okos no la hatene maran maske iha tempu bailoro naruk. Preokupasaun ida ne’e komunidade hato’o ba iha instituisaun oi-oin maibe la hetan resposta ne’ebe positivu.
Tanke grafitasaun fornese bee mos ba komunidade iha Suku Betano
Hafoin Programa PNDS tama iha Suku Betano, iha fulan Setembru 2013, komunidade tu’ur hamutuk hodi identifika problema saida mak sira enfrenta iha Suku laran durante ne’e. Mehi atu asesu ba bee mós ida ne’e sai realidade hafoin komunidade tu’ur hamutuk hodi deside atu dada bee Risoko ho sistema bomba no grafitasaun atu nune’e bele fornese bee mos ba komunidade sira iha Suku.
Subsídiu PNDS ne’ebé aloka ba iha Suku Betano ho montante $55,000.00, subsídiu ida ne’e inklui orsamentu rua : $6000.00 ba subsídiu operasional, utiliza hodi apoiu servisu administrasaun iha Suku laran, $49,000.00 ba subsídiu infraestrutura, utiliza hodi sosa materiais infraestrutura ho selu traballador.
Subsídiu infraestrutura iha leten, ezekuta ba iha projetu rua (2) mak hanesan konstrusaun Kanalizasaun bee mós husi Bee matan Risoko ba komunidade Aldeia Rai-Fusa ho Aldeia Leo-Ai ho montante orsamentu $29,131.63, konstrusaun sentru komunitáriu multi funsaun iha Aldeia Selihasan ho montante orsamentu $19,868,37.
Konstrusaun bee mós ida ne’e ofisiálmente hetan inagurasaun husi Vise Ministru da Administrasaun Estatál, Sr. Tomás do Rosário Cabral, iha loron kuarta feira, 30 Setembru 2015.
-
- Bee matan iha rai okos ne’ebe komunidade dada uza sistema bomba ho grafitasaun
-
- Torneira Sentral, besik iha komunidade nia uma
-
- Vice Ministru Administrasaun Estatal, Tomas do Rosario Cabral rega hela bee ba Chefe Suku Betano Saturnino Tilman
