Ministru Administrasaun Estatál Jorge Teme ho Embaixador Australia nian Peter Doyle
Ministériu Administrasaun Estatál, reprezenta Governu Timor-Leste, asina ona Akordu Subsidiáriu ida ho Governu Australia ba ninia kontinuasaun apoiu ba PNDS, iha loron Kuarta-feira, 7 Maiu 2014.
Governu Australia serbisu hamutuk ona ho Governu Timor-Leste durante tinan barak ona, inklui apoiu kriasaun PNDS nian husi tinan 2011 to’o 2014.
Australia fo apoiu fundu hodi finansia asesór sira ne’ebé serbisu ho Ministériu Administrasaun Estatál, Ministériu Finansa no Komisaun Funsaun Públiku hodi dezenvolve no haforsa sistema korporativu ne’ebé permite PNDS atu bele sirkula osan ba Suku hirak no garante katak programa ne’e la’o duni. Apoiu ne’e inklui, sistema finanseira, jestaun rekursu umanu, planu serbisu, lojístika no jestaun informasaun.
Iha tinan 2013, serbisu ho organizasaun formasaun Timor nian, Australia fornese ona formasaun ba ema liu na’in 400, barak mak serbisu ona hanesan fasilitadór sub-distritu sosial, tékniku no finanseira ba PNDS.
La’o tuir susesu implementasaun PNDS durante ne’e, Governu Australia sei iha komitmentu atu kontinua sira nia apoiu ba PNDS to’o tinan 2017. Valór totál husi sira nia apoiu ne’e mak hamutuk AU$ miliaun 45.
Akordu ne’e loke posibilidade ba apoiu liu tan ba PNDS to’o tinan 2020, depende ba aprovasaun husi Parlamentu Australia nian.
Orsamentu Estadu Timor-Leste nian ba PNDS hamutuk US$ miliaun 294.3 ba tinan walu nia laran.
