Diretora PNDS, Dulce Guterres Junior hamutuk ho Komandante Geral PNTL, no Embaisadora Nova Zelandia Asina akordu Tekniku Implementasaun
Konkordansia ba programa pilotu hari’I uma Ofisial Polisia Suku nee positivo ona atu bele implementa hafoin realiza akordu rua entre Ministeriu Interor no Ministeriu Administrasaun Estatal nudar akordu polítiku ba apoiu kontinuidade uma ba OPS depois programa pilotu nee remata. Akordu seluk mak akordu parseria tékniku ne’ebé hala’o entre PNTL, PNDS no MFAT hodi hare liu ba kestaun tékniku implementasaun programa ne’ebé sei uza sistema serbisu hotu iha PNDS hodi koopera ho komunidade sira iha Suku ba hari’i uma OPS. Akordu rua nee hala’o iha salaun Enkontru Ministeriu Interor Dili (01/08/2017) Iha programa apoiu pilotu uma ba OPS, Nova Zelandia sei fo apoiu $ 500,000 dolar Amerikano ba pilotu hari’i uma Ofisial Polisia Suku hamutuk sanulu resin ha’at.
Iha oportunidade nee Embaisadora Nova Zelandia ba Timor Leste, Vicki Poole afirma komitmentu Governo Nova Zelandia katak sira kontinua halo kontribuisaun signifikante ba seguru no asegura komunidade Timor Leste, faze programa pilotu uma OPS hanesan parte ida husi programa apoiu polisiamentu komunitariu iha Timor Leste lao ona durante tinan ha’at ba kotuk.
Ministru Interior, Longuinhos Monteiro hamutuk ho Vice Ministru Administrasaun Estatal, Tomas Cabral Asina Akordu Politiku ba Kontinuidade Implementasaun uma OPS
Entretanto Vice Ministru da Administrasaun Estatal, Tomas do Rosario Cabral programa nee nudar pasu ida tan atu desenvolve suku liu-liu lori asistensia polisiamentu nia ba iha Suku tanba nee maka programa nee sei benefisia tebes Ministeriu da Administrasaun Estatal. Ho nune’e Vice Ministru Estatal lori Ministeriu da Administrasaun Estatal no Governo Timor Leste hato’o agradesimentu boot ba tulun husi Governo Nova Zelandia ne’ebé bele fo apoiu hodi hakat tan pasu ida hodi lori desenvolvimentu to’o iha komunidade nia le’et.
Nune’e mos Ministru Interoir, Longuinhos Monteiro iha nia intervensaun hateten Governo Nova Zelandia hatudu ona sira nia komitmentu atu apoiu Timor Leste hahú kedas tinan hat ba kotuk liu husi atividade lubuk ida ne’ebé bele lao ho susesu ida mak programa polisiamentu komunitariu ne’ebé implementa ho diak, ho nune’e Ministru Interior, Longuinhos Monteiro hato’o mos agradese ba governo Nova Zelandia ne’ebé kontinua iha komitmentu atu apoiu Timor Leste.
