Atu kordena di’ak liután implementasaun programa PNDS iha tinan 2015, Sekretariadu Tékniku PNDS hala’o enkontru kordenasaun hodi halo avaliasaun serbisu ne’ebé hala’o iha tinan 2014 (19/12/2014, ETDA-Dili).
Miguel P. de Carvalho ( DGDL), hato’o mensajen iha reuniaun kordenasaun ba dala ikus iha 2014
Enkontru kordenasaun ba dala ikus ne’e ko’alia kle’an kona-ba progresu no difikuldade ne’ebé enfrenta iha implementasaun programa durante tinan 2014, Alende ne’e, iha oportunidade nee diskute hamutuk mós rezultadu monitorizasaun ne’ebé hala’o husi parseiru dezenvolvimentu sira hanesan Banku Mundiál ho Fundasaun Asia (TAF), liu-liu iha parte partisipasaun komunidade nian no aprosimasaun ne’ebé akontese iha implementasaun programa PNDS durante tinan 2014.
Diretór Jeral Dezenvolvimentu Lokál, Miguel Perreira de Carvalho, iha nia intervensaun loúba ho servisu tomak ne’ebé hala’o husi funsionáriu PNDS, tantu husi nasionál, distrital nomós sub-distrital durante tinan 2014, maibé nia sujere atu funsionáriu hotu-hotu atu haka’as an nafatin no dixiplina atu nune’e bele melhora liu tan servisu iha tinan 2015.
Funsionario PNDS tantu nasional nomos sub-nasional partisipa iha enkontru ba dala ikus 2014
Mesmu iha implementasaun programa durante tinan 2014 hasoru difikuldade barak maibé iha progresu lubuk ida ne’ebé fó ona benefísiu ba komunidade sira hodi asesu ba infraestrutura bázika ne’ebé komunidade rasik mak harii ona iha sira nia leet, ezemplu konkretu mak hanesan iha fatin balun ne’ebé durante tempu barak la asesu ba bee mós, oras nee bele asesu ona ba bee mos iha sira nia knua ou aldeia.
Tinan 2015 hanesan tinan dixiplina ba funsionáriu estadu ou ajente administrasaun publika hotu, tanba ne’e hirarkiamente funsionáriu hotu tenke kumpri, solok ba tinan foun 2015
