Ekipa PNDS Munisípiu Manatuto Hala’o Sorumutu Avaliasaun Annual ba Implementasaun Programa PNDS Tinan 2016

Administrador Munisipiu Manatuto akompaña husi Diretora PNDS Nasional ho Kordenador PNDS Munisipiu Manatuto

Administrador Munisipiu Manatuto akompaña husi Diretora PNDS Nasional ho Kordenador PNDS Munisipiu Manatuto.

Hafoin kompleta implementasaun Programa Nasional Dezenvolvimentu Suku (PNDS) ba Siklu dahuluk (Faze I, II & III), ekipa PNDS Munisípiu Manatuto hala’o Sorumutu avaliasaun annual ho nia objetivu atu revé fila fali vantajen no dezvantajen ne’ebé ekipa Munisípiu sira infrenta iha implementasaun programa PNDS. Avaliasaun annual ba implementasaun Programa  PNDS ida ne’e hala’o iha Salaun Bescem, Manatuto Villa (25/01/2017).

Dulce Guterres Junior, nu’udar Diretora Nasional Programa PNDS ne’ebé partisipa iha sorumutu ne’e, hatete katak sorumutu avaliasaun ida ne’e importante tebes tanba bele fo oportunidade ba iha autoridade hotu  tantu husi Suku, Postu Administrativu nomos iha Munisípiu atu halo diskusaun liu-liu ba iha  dezafiu ne’ebé sira infrenta atu nune’e iha implementasaun programa PNDS Siklu tuir mai bele di’ak liu tan.

Administradór Munisípiu Manatuto, Fernando Souza, iha ninia intervensaun apresia tebes ba iha implementasaun programa PNDS tanba fo impaktu pozitivu ba iha komunidade sira iha baze.

“Programa PNDS ne’ebé implementa iha Munisípiu Manatuto durante ne’e hetan rezultadu ne’ebé di’ak no fo benefísiu direitamente ba komunidade sira iha Suku no aldeia.” Hato’o husi : Fernando Souza, Administradór Munisípiu Manatuto.

Koordenasaun servisu entre ekipa PNDS Munisípiu ho liña seitoral sai hanesan asuntu importante iha avaliasaun ne’e tanba ho koordenasaun ne’ebé forte bele evita programa duplu nomos ego seitoral atu nune’e  bele atinji dezenvolvimentu ne’ebé di’ak ba iha futuru Munisípiu Manatuto.

Iha parte seluk, Cesar Soares, hanesan Chefe Suku husi Suku Fatumakerek, Postu Administrativu Laclubar kontente ho programa PNDS tanba dezenvolvimentu ne’ebé programa ne’e hala’o fo benefísiu duni ba iha komunidade sira ne’ebé hela iha area rurais, no nia husu ba iha governante sira atu iha nafatin komitmentu hodi implementa programa ne’e iha Suku.

“Programa PNDS ne’ebé implementa iha ami nia Suku, ami kontente, tanba fo benefísiu direita ba komunidade, tanba ne’e ha’u husu ba Ministériu relevantes, atu tinan ida ne’e programa PNDS bele kontinua nafatin hodi hadi’ak komunidade nia moris.” Cesar Soares, Chefe Suku Fatumakerek.

Diskusaun grupu hodi buka solusaun ba dejafius ne'ebe infrenta iha implementasaun PNDS

Diskusaun grupu hodi buka solusaun ba dejafius ne’ebe infrenta iha implementasaun PNDS.

Iha avaliasaun ne’e ekipa PNDS Munisípiu nomos Ekipa PNDS nasional globalmente aprezenta susesu nomos dezafiu ne’ebé infrenta iha implementasaun programa PNDS tantu iha nivel Nasional, Munisípiu, Postu nomos Suku. Apresentasaun ne’e hetan responde pozitivu tanba partisipante barak mak kontribui no fo sira nia hanoin iha diskusaun liu husi rekomendasaun nomos sujestaun ne’ebé konstrutivu hafoin remata apresentasaun.

Atividade ikus ba iha sorumutu avaliasaun annual ida ne’e mak fo apresiasaun ba iha Suku melhor sira liu husi intrega prémiu mobiliáriu hanesan kadeira no meja, Sertifikadu nomos taxa, meus ida ne’e hanesan motivasaun ida ba suku sira seluk atu kompetetivu liu tan iha implementasaun programa PNDS. Suku melhor iha implementasaun programa PNDS Munisípiu Manatuto iha tinan 2016 mak hanesan tuir mai ne’e:

  1. Suku batar, Postu Administrativu Laclubar
  2. Suku Manufahi, Postu Administrativu Soibada
  3. Suku Laco Mesak, Postu Administrativu Laclo

Partisipante ne’ebé partisipa iha Sorumutu Avaliasaun Annual PNDS ne’e mais ou menus ema atus ida resin kompostu husi Autoridade Munisipál ho Postu Administrativu, Lider komunitáriu, Ekipa Jestaun Suku, Ekipa PNDS Nasional nomos Munisípiu no inklui ekipa apoiu PNDS husi Cardno.


Lian / Language