Ekipa PNDS Munisípiu Liquiça Hala’o Sorumutu Avaliasaun Annual ba Implementasaun Programa PNDS Tinan 2016

Soromutu Avaliasaun Anual PNDS 2016 iha Munispiu Liquisa.

Hafoin kompleta Implementasaun Programa Nasional Dezenvolvimentu Suku (PNDS) ba siklu primeiru (Faze I, II, III), ekipa PNDS Munisípiu Liquiça, hala’o sorumutu avaliasaun annual ho nia objetivu atu hare susesu nomos dezafiu ne’ebé ekipa PNDS Munisípiu infrenta durante períodu liu ba iha implementasaun programa PNDS. Atividade ida ne’e hala’o iha Salaun Administrasaun Munisípiu Liquiça, (16/02/2017).

Administradór Munisípiu Liquiça, Domingos da Conceição, hatete katak sorumutu ida ne’e importante tebes tanba bele sukat rezultadu implementasaun programa PNDS tinan tolu liu ba iha Munisípiu Liquiça tantu ninia susesu nomos dezafiu ne’ebé ita hotu hetan nomos hasoru. Iha parte seluk nia husu ba Chefe Suku ne’ebé foun (foin eleitu) atu konsulta no kolabora hamutuk ho ekipa sira iha suku laran atu nune’e bele fo susesu ba dezenvolvimentu iha Suku, tantu liu husi programa PNDS nomos programa sira husi seitor seluk.

Diretór Delegasaun PNDS Munisípiu Liquiça, Fernando da Gonçalves hatete husi avaliasaun jerál ne’e mak ita bele diskute progresu no dezafiu ne’ebé ita hasoru durante ne’e,  dezafiu ne’ebé ita hetan sai hanesan  referénsia ida ba ita atu diskute no buka solusaun hamutuk iha avaliasaun ida ne’e atu nune’e iha implementasaun programa PNDS siklu tuir mai ita bele hadi’ak liu tan. Iha avaliasaun ne’e ekipa tékniku husi PNDS Nasional ho Munisípiu halo apresentasaun ba rezultadu implementasaun programa ne’ebé atinji ona nomos dezafiu hirak ne’ebé infrenta iha siklu liu ba no globalmente rezultadu husi programa ne’e fo benefísiu ba iha komunidade sira iha baze.

Chefe Suku Maubara Lissa fo Apresiasaun ba implementasaun Programa PNDS.

Iha parte seluk, Rui Manuel, hanesan Chefe Suku Maubara Lissa, husi Postu Administrativu Maubara, apresia tebes ho implementasaun programa PNDS, maske ho orsamentu ne’ebé ki’ik sira konsege harí infraestrutura bázika hanesan bee mos ho saniamentu nomos fatin ba atendementu públiku ne’ebé fo benefísiu duni ba iha ninia komunidade sira no nia sujere atu programa ida ne’e kontinua nafatin iha tinan tuir mai.

“Programa PNDS ne’ebé implementa iha ami nia Suku, di’ak tebes, no ami kontente, tanba fo benefísiu direita ba komunidade”. Rui Manuel Chefe Suku Maubara Lissa.

Munisípiu Liquiça rasik, iha siklu primeiru liu ba projetu ne’ebé konstrui husi komunidade liu husi programa PNDS hamutuk iha 57, ho ninia orsamentu US$1,254,561.89. Projetu hirak ne’e kobre ba iha seitor hotu hanesan Bee mos no saniamentu iha projetu 22, Edukasaun, Kultura no Desportu iha projetu 4, Saúde iha projetu 2, Dalan, Ponte no Kontrolu de Cheias iha projetu 11, no seluk-seluk tan iha projetu 18.

Atividade ikus ba iha sorumutu avaliasaun annual ida ne’e mak fo apresiasaun ba iha Suku melhor sira liu husi intrega prémiu mobiliáriu hanesan kadeira ho meja, Sertifikadu nomos taxa, meus ida ne’e hanesan motivasaun ida ba suku sira seluk atu kompetetivu liu tan iha implementasaun programa PNDS iha siklu tuir mai.

Suku melhor iha implementasaun programa PNDS Munisípiu Liquisa iha tinan 2016 mak hanesan tuir mai ne’e:

1. Suku Daru Lete, Postu Administrativu Liquiça Villa;
2. Suku Ulmera, Postu Administrativu Bazartete;
3. Suku Maubara Lissa, Postu Administrativu Maubara.

Total Partisipante husi avaliasaun annual PNDS mais ou menus ema 50 nolu resin, kompostu husi  Administradór Munisipál Liquiça, Administradór Postu Administrativu, Chefe Suku no Konsellu Suku, Ekipa Jestaun Suku, Ekipa PNDS Nasional nomos Munisipál no inklui ekipa apoiu PNDS husi Cardno.

© Copyright 2017 Programa Nasional Dezenvolvimentu Suku