Ekipa EJS hamutuk ho komunidade suku Lacu-Mesac halo Enkontru Determinasaun Prioridade (PIIM).
Determinasaun prioridade Aldeia no Suku husi Minisipiu Manatuto ba Planu Investimentu Integrado Munisipal (PIIM) hahú iha Loron 06/03/2017.
Iha Suku Laco-Mesak Postu Administrativo Laclo, enkontru determinasaun prioridade ne’e realiza iha loron quarta Feira, 08 Marsu 2017, lolos enkontru determinasaun prioridade ne’e hahú iha nivel Aldeia maibe aldea lima (5) ne’ebé partense ba Suku Laco-Mesak konsentra hamutuk iha sede Suku hodi hahú identifika no diskute prioridade husi kada aldeia.
Iha sorumutu determinasaun Prioridade ne’e Chefe Suku Laco-Mesak, Sergio R.R. Pereira, hateten “Sorumutu ne’e importante ba komunidade hotu atu identifika difikuldades ne’ebé sira enfrenta hodi propoin hanesan proposta prioridade ba Plano Investimentu Integrado Munisipal (PIIM) iha Suku refere.
Ekipa PNDS Munisipiu Manatuto, esplika konaba prosesu Determinasaun Prioridade aldeia no suku ba Programa (PIIM).
Chefe aldeia lima (5) ne’ebé partisipa iha enkontru determinasaun prioridade nee espresa sentimentu kontente ho atividade ne’e tanba iha implementasaun ba Programa PDIM no PNDS la’os deit atu responde komunidade ninia problema dezenvolvimentu, maibé kapasita mós komunidade sira oinsá bele tur hamutuk hodi determina no identifika problema dezenvolvimentu iha suku no komunidade sira mak sei halo rasik planu no implementa, monitoriza nomós jere rasik orsamentu ne’ebé governu aloka liu husi programa PDIM no PNDS.
Rezultadu husi sorumutu ida ne’e sei submete ba posto administraivo hodi diskute klean liu tan ho sectoral kona-ba prioridade ne’ebé komunidade sira propoin husi aldeia no suku hodi bele sinkroniza ho plano sectoral.
Chefe Suku Lacu-Mesac, Sergio Perreira deriji komunidade hodi Determina Prioridade aldeia no suku.
Hafoin hetan diskusaun klean ho sektoral iha Postu no hetan verifikasaun husi komisaun Postu mak proposta prioridade hirak ne’e sei kontinua submete ba Nivel Munisipiu hodi finaliza sai hanesan proposta prioridade husi Komunidade ba Nivel Nasional hodi tau hanesan Proposta ba implementasaun Planu Investimentu Integrado Munisipal (PIIM) iha tinan 2018.
Sorumutu enkontru determinasaun prioridade ne’e partisipa husi Administrador Posto Laclo, Chefe Unidade Administrasaun Finansas reprezentante PNDS Nasional, Ekipa PNDS Posto Administrativo Laclo, Ekipa EJS suku Laco-Mesak nomós komunidade Suku Laco-Mesac.
